阿澤拎錢撐老婆 拒夫妻檔拍劇

「視后」田蕊妮前晚花五位數宴請劇集《巨輪》台前幕後慶功，除幕後工作人員外，演員包括有蕭正楠、劉江及高層曾勵珍等。帶埋老公杜汶澤現身的阿田笑謂，老公負責請客：「我要問佢借錢呀，叫佢埋單。」阿田透露一月將拍新劇《無雙譜》，農曆新年已接到不少登台工作，五月又出唱片，問到酬勞可有加價﹖她則笑說：「都係開心價。」

威風慣唔做阿四

滿場飛的杜汶澤忙於招呼賓客，講到阿田指要由他埋單，阿澤笑說：「唔係嘛，我今晚諗住嚟食軟飯喎，田總請食飯梗係要嚟黐啦，不過，我埋單都得，冇一個獎會係一個人嘅功勞，請大家食飯係應該嘅。」問到阿澤送甚麼禮物給老婆？他說：「佢已經有最好嘅禮物啦，同TVB做嘢最緊要唔好斤斤計較，唔好計較金錢，比較片酬，劇本啱就拍，唔係會好痛苦，我就繼續喺經濟上支持佢，等佢無後顧之憂。」阿澤被問到會否夫妻檔為無綫拍劇？他笑說：「夫妻檔唔好喇，小弟喺片場威風八面慣，點可以淪為佢嘅小助理，畀佢話都冇癮啦。」講到阿田被翻舊帳指是「小三」，他則說：「娛樂新聞係咁，冇乜所謂啦。」

「視后」田蕊妮宴請《巨輪》台前幕後齊慶功。

阿澤與劉江鬥演金句：「講呢啲！」，引得全場哄堂大笑。

惡搞劉江講呢啲

另外，拍攝大合照時，阿澤邀請劉江坐在中間拍照：「劉老師坐啦﹗講呢啲。」劉江也十分玩得親口演繹網上瘋傳金句：「坐咪坐囉，講呢啲﹗」引得大家哄堂大笑。蕭正楠則透露《巨輪》出街後，令他多了搵銀機會，稍後會與阿田到澳門出席活動，酬勞上升一倍。問到豈不是加速儲夠老婆本﹖蕭正楠則謂還未儲夠，皆因依傢結婚生仔開支好大。

文：影視組