陳偉霆學華哥做責任男

電影《救火英雄》中，任達華、陳偉霆首度碰頭已默契十足，互當對方是老師，華哥多得William在片場教他跳舞，William則從華哥身上學到演技及當演員的態度：「初拍電影時自己都幾掙扎，因為搵我都係做舞男、戀母等唔討好嘅角色，後來我諗到前輩都放得低，點解我放唔低？」

演消防捱到肺炎

令William最印象深刻的是拍華哥持萬能斧在煙囪上用全力不停拍打五分鐘：「導演入咗華哥個世界，冇嗌cut，最後華哥冇晒力都照打，當時全場靜晒，一拍完大家都拍掌，真係導演一日未嗌cut都唔好停！」華哥就大讚William在青黃不接的電影圈，有潛質成為未來當家小生：「新一代男演員冇幾個，希望大家睇完呢套戲會對佢另眼相看。」

華哥大讚，令陳偉霆受寵若驚！	陳偉霆榮升業主，眉飛色舞。	華哥之前捱到肺積水，幸很快便痊愈，肺部好番。

「警察」形象深入民心的華哥今次演消防員終於有新嘗試，雖然一樣是紀律部隊，他說比演警察要辛苦得多：「係體力上嘅消耗，一個氧氣樽已經廿幾磅，日日都要喺個50幾60度嘅燒烤爐做嘢。」大家要不停飲水，雖然冇晒脂肪，卻變咗水腫。「鐵人」華哥都拍到病：「之前抵唔住寒冷天氣搞到肺炎有肺積水，好彩最終冇事。」他更拿出電話騷出X光片向大家詳細解釋：「醫生話我生命力強壯，一個星期就好番，但都同個女、老婆分居咗一個禮拜，個女一見番我即刻要我抱，原來玩抱抱都幾好玩！」

剛置業並非愛巢

William亦認同拍此片很辛苦：「我哋全部戴晒面罩其實可以用替身，但全部前輩都親身上陣，我邊有資格開聲。」華哥就解釋：「因為係肢體語言唔同，替身同自己做係兩回事！」William十分敬佩華哥，從對方身上學會如何做個「負責任的男人」，就是做「樓王」：「成日聽到前輩喺邊度邊度置業，作為一個男人係要學嘅。」活學活用的他剛剛置業，但笑着否認是跟女友蔡卓妍的愛巢。

攝影：鄭家俊　

服裝：Diesel、ITHK　　　　　　　

髮型：Hair Corner、MM IL Colpo

文：影視組