Twins撐伍樂城 翻出集體回憶
為Twins製作過逾20張唱片的伍樂城（Ronald），自己也寫過無數金曲，他將舉行首個作品展，Twins為報答伯樂，一口答應任嘉賓，更隨時會在舞台使出初入行時的招牌側手翻，喚起歌迷的集體回憶。
星級音樂監製伍樂城為慶祝入行15年，將於今年3月29至30日，假紅館舉行兩場「伍樂城幻想國度作品演唱會56X Live 2014」，Ronald為Twins推出過逾20張唱片，Twins當然率先答應任嘉賓，陳慧琳及衞蘭等到時亦會上台獻聲。
錄音怪行嚇窒兩女
Twins與Ronald合作無間，三人在錄音室發生過不少笑料，Twins大爆Ronald在錄音期間的一個小秘密，嚇得她們心驚驚，阿嬌說：「通常錄音，監製係邊聽邊點頭，但Ronald係擰頭。」阿Sa當時亦擔心是自己未發揮到水準：「真係好緊張，我哋就心諗：『死啦，係咪我哋唱得唔好呀？』原來佢只係陶醉得滯，聽聽吓歌不自覺擰頭。」
提議林夕表演食魚
而Twins初出道時，常在舞台表演側手翻，問她們在作品展上可會重施故技贈興？兩人隨即作狀鬆骨：「有需要都可以，睇吓Ronald想唔想？想我哋就去練，不如Ronald跳，我哋唱啦！」
不過，Twins稱希望能看到Ronald與林夕兩位音樂大師同場過招，即興作歌填詞，Ronald笑言：「夕爺可以一個人食一條魚，可以叫佢表演，不過佢好難請到。」
髮型：Ray
化妝：Flan Wong
文：音樂組