胡定欣王浩信 戀足三次終成正果

胡定欣在無綫新劇《貓屎媽媽》中，與《萬千星輝頒獎典禮2013》「飛躍進步男藝員」得主王浩信第三度演情侶，之前不能開花結果的感情，今次終於有新轉機。

定欣說：「同浩信喺《刑警》、《戀愛季節》，次次都冇happy ending。今次監製安排我哋喺學生時代已經認識，劇情話我一直冇拆穿佢暗戀我，點知佢知道咗反而嬲我。呢個劇係我入行以來最多回憶嘅戲，玩盡咗孖辮校服look，浩信就梳咗郭富城中間界look。劇情仲講我哋嘅偶像係Leslie（張國榮），會有好多集體回憶，觀眾一定會鍾意！」

演後母有難度

除了與浩信有感情線，定欣又與資深演員杜燕歌飾演老夫少妻，可謂演技大考驗。她說：「燕歌真人都係書生型靚仔，同角色設定好接近。我同燕歌呢pair係想帶出『慢活』嘅態度，做人要享受生活。」

胡定欣相信《貓》劇必定能掀起大家集體回憶。	王浩信與胡定欣大人扮學生，造型搞笑。	杜燕歌與胡定欣演老夫少妻。左起：米雪、杜燕歌、胡定欣、黃宗澤

於劇中飾演岑麗香同張惠雅後母的定欣稱：「其實我哋真實年齡唔係相差太遠，最難係點樣以又係朋友又係後母嘅身份去帶出同呢兩個女嘅溝通。（怕唔怕被外界同《My盛Lady》收視作比較？）冇壓力，我對個劇好有信心，因為拍得好開心，演員間又充滿火花，希望鍾意《My盛Lady》嘅觀眾都可以繼續支持我哋。」

文：影視組

攝：沈健程

化妝：Jessica Chan

髮型：Matt Chiu @ Xenter