吳嘉龍猴擒拖女慘食檸檬
身邊女伴團團轉的吳嘉龍（Carl），日前與一名長髮女到中環夜蒲，沿途見兩人有講有笑，期間Carl想伸手拖女伴時，該女伴卻突然縮開，慘食檸檬的Carl，隨後到附近酒吧搵朋友吹水撚狗。
喜劇演員吳耀漢兒子吳嘉龍，原本有一位韓籍女友，奈何因工作太忙冇時間拍拖，最終分手收場。一向喜愛夜蒲的他，甩拖後身邊卻不乏女伴，日前約晚上10時半，身穿間條衫配黑外套的Carl，與同樣以全黑打扮的長髮女現身中環SOHO區搵食，沿途見兩人並肩而行，不時低頭密密傾，未幾進入了該處一間餐廳醫肚。甫坐下，Carl隨即着店員落柯打，點了兩杯飲品及小食，焚化爐Carl三扒兩撥掃清枱上食物，極速埋單與女伴離開。
慘食檸檬感無癮
步出後，當兩人行至文武廟附近，Carl突然伸手想拖女伴，但該女伴卻突然彈開，慘食檸檬的Carl，看似頓時感到無癮，不時頭耷耷，之後在附近酒吧遇見相熟朋友，Carl即跟朋友吹水，又逗玩對方的狗仔，女伴則站在旁邊等候。撚完狗，Carl煲完支煙，冒着罰款一千五百元，隨手將煙頭掉落地，然後與女伴到酒吧消遣。
文、攝：追蹤組