現年37歲的愛爾蘭影星哥連法奴（Colin Farrell）前日上清談節目自爆曾戀年長44歲的「玉婆」伊莉莎伯泰萊（Elizabeth Taylor），「母子戀」維持近兩年！
影星哥連前日上名嘴艾倫迪珍妮絲（Ellen DeGeneres）的清談節目宣傳新片《大夢想家》（Saving Mr.Banks），自爆當年與已故的玉婆的一段情，簡直嚇窒全城！哥連稱09年時，他趕往洛杉磯醫院迎接當時女友Alicja Bachleda-Curus為其生下細仔Henry的出生，剛巧在電梯間碰上玉婆的經理人Tim Mendelson，從對方口中得悉玉婆因接受心臟植入支架手術而留院，哥連當時雖只借Tim向玉婆打招呼，但數日來一直念念不忘：「我打電話畀我嘅公關，問佢我可否送鮮花慰問玉婆，他竟然回答：『真搞笑！我依家眼前就有一支玉婆送你嘅蘭花。』」之後兩人便透過公關安排約見面！
兩人年齡雖相差44年，但即展開不為人知的「母子戀」，哥連憶述：「佢同我都係唔易入眠嘅人，所以有時我會喺凌晨兩點鐘打畀佢，之後我哋就開始傾偈，傾吓傾吓就成晚，真係好開心。我好鍾意佢，佢係一個好正嘅女人。」哥連更自爆自這段「浪漫戀情」後，就冇再戀上其他人，笑言：「我都想成為佢第8任老公，不過我哋卻偏離了原有的軌道。」搞到聽得興起的艾倫都忍不住發出「嘩嘩聲」。
其實哥連一向偏愛年長的女人，曾與51歲的狄美摩亞（Demi Moore）及70歲的Eileen Atkins傳緋聞，不過今次搭上玉婆真係估唔到！
文：外娛組