呂良偉珠寶氹老婆多多億善
近年生意撈到風生水起的呂良偉，加上內地演藝事業暢旺，年賺過億！早前，呂良偉趁回港休息期間，跟太太楊小娟到中環Shopping，半粒鐘便掃走六百萬翡翠！呂良偉承認喜歡買珠寶氹靚老婆，為免「買錯心頭好」，每次買珠寶亦定必跟太太同行，細意挑選！
於娛圈打滾數十載的呂良偉，憑着專業演員態度以及獨到眼光，在演藝界以及商界都甚為吃得開，近年由他與友人共同投資的出租車媒體廣告生意「觸動傳媒」，更愈做愈大，公司每年營業額達2.4億元，估計市值24億元，令呂良偉身家暴漲至少十億元，年賺逾一億元！
要求高一齊揀
一向家庭觀念甚重的呂良偉，賺到錢亦很願意花錢氹屋企人開心，早前，《好報》便獨家拍得呂良偉與太太楊小娟到中環珠寶店閒逛，短短半小時便買下六百萬翡翠頸鏈，認真闊綽！據知，多年來，呂良偉亦很喜歡送珠寶給太太，至今至少買了逾億珠寶冧旺妻！
記者就年賺過億兼掃逾億珠寶一事，昨日致電呂良偉，他表示：「我買禮物畀太太，最緊要梗係佢喜歡，佢一向對珠寶好有研究，所以，最啱送珠寶畀佢，每次買我亦一定要同佢一齊去，因為佢好有眼光同要求高。（好錫太太？）佢乜嘢都好好，好抵錫！」
大反派有心態
雖然生意做得好，但呂良偉並無放棄「老本行」演藝事業，早前在港拍攝新戲《風暴》，便很用心去揣摩戲中大反派角色，呂良偉笑言接演此角色時，曾有心理包袱：「呢幾年我嘅心態唔同咗，演大反派要先調整心態，想以一個反面教材去話畀大家聽，做壞事唔會有好嘅下場。」
文：影視組