鄭希怡風雨同路嫁作梁婦
英皇藝人鄭希怡（Yumiko）昨日與化妝師老公梁學儲（Andy）在泰國蘇梅共諧連理，為圓太太的夢幻婚禮，新郎哥特別挑選在沙灘旁邊的酒店行禮，在煙花璀璨下一對新人深情宣誓，三日兩夜玩盡不同主題派對，留下美好回憶。
Yumiko昨日與男友Andy在泰國蘇梅島舉行婚禮，雖然今次是pre-wedding party，但婚禮揀選當地時間下晝五時黃昏美景下進行，穿上由陳華國為她度身訂造的婚紗禮服，在八十位親友嘉賓見證下宣誓、交換戒指，幸福滿瀉，新娘子笑說：「揀選喺蘇梅島舉行婚禮，係因為佢係我同老公第一次旅行嘅地方，當時Andy曾講過如果將來結婚，一定選擇蘇梅行禮，好多謝老公為我完成夢想婚禮。」
新郎豪包酒店
對陽光與海灘情有獨鍾的Yumiko，婚禮地點特別揀在海邊舉行，出席今次結婚派對的圈中好友包括徐濠縈、李璨琛、陳小春、黃伊汶、陳國坤、谷德昭、劉浩龍、蘇永康及梁烈唯等，Yumiko說：「好開心有咁多朋友來見證我人生難忘的一刻。」據知Andy豪氣包起整間酒店，宴請賓客共度三日兩夜歡樂時光，問到花費多少？Andy說：「錢唔重要，最重要大家開心，畀Yumiko留下難忘回憶。」
大雨影響心情
今次的pre-wedding party共有三個主題派對，前晚是嘉賓到埗的welcome dinner，昨晚是西式婚宴，之後還有個after party，每個派對都有特別的dress code，新娘子鬼馬地賣關子說：「我只可以講今晚全體嘉賓都會穿上白色服飾，好多謝啲朋友帶咗三套唔同主題嘅服裝嚟。」婚宴上煙花盛放，泰國歌舞表演，場面浪漫，令Yumiko開心又感動。
昨午Yumiko透過長途電話接受本報訪問，婚禮前她很擔心，因為周一飛抵蘇梅後，連日來每朝都狂風大雨，敷緊面膜的她說：「呢兩日早餐過後中午就出太陽，我都祈禱希望今日天公作美，喺房度仲掛咗個晴天公仔。」不過婚禮舉行前滂沱大雨，令她有點悶悶不樂，婚禮也被迫推遲了兩小時。
文：音樂組