莊思敏林盛斌友情有義

林盛斌：林 莊思敏：莊

欣賞對方

林：第一次我係幾時見你o架呢？我印象中好似2006、2007年朋友嘅生日party，係一間私人會所飲嘢嗰陣識你，你仲同緊吳浩康一齊。

莊：吓？竟然？唔係電台見o架咩？

林：唔係呀，嗰陣係吳浩康介紹你畀我識，我心諗個女仔咁高嘅，又靚又索，覺得呢個女孩子真係幾好！

莊：係呀，嗰次係第一次見，不過真正Friend係幾時呢？我都唔記得啦，記得你好鬼多嘢講o架，平時開工等埋位嗰陣，係咁不斷同我傾偈。

林：點解我會同你熟得到呢？我諗應該係因為我好欣賞你。講真，以你嘅家底，可以唔需要咁勤力去做嘢都可以維持到生活，但你又唔係，好靠自己。你係我喺呢個圈所認識嘅女仔當中，幾勤力同好有義氣。

莊思敏透過前男友吳浩康而認識阿Bob。	莊思敏是少數承認隆胸的模特兒。	阿Bob在劇集《老表，你好嘢！》的造型深入民心。

莊：梗係啦，我靠自己o架嘛！不過我都覺得你好有義氣，同埋我發覺你好似唔使瞓咁，無時無刻都工作緊，個人又肯捱義氣，有時啲job根本係難頂，我見到你會做咗去o架喎。

互相勉勵

林：同埋你係我唯一嘅女性朋友，我係會send短訊畀你，可能本身我唔當你係女仔啦，烈女嚟o架嘛！你份人又大膽同敢做敢認，你認自己做過隆胸手術喎，雖然我對整形係冇態度，但我好欣賞你肯認同踏出呢一步！仲有一樣要讚你，就係有一日夜晚我返屋企食麵，咁啱電視播緊你同梁榮忠主持一個機械人比賽，見到你好識搞氣氛，又好識執生，愈嚟愈叻！

莊：多謝多謝！但我諗番起，我同你都經歷過一個有口難言嘅階段，有時候我唔開心都會搵你傾偈，連有時我可能收到風話邊個唔鍾意我，我都會打畀你講心事！

林：係呀，最記得有次幫一套電影配音，點知出到嚟個效果我唔係咁滿意，個晚揸車返屋企愈諗愈唔開心，結果立即打畀你，聽到你喺電話度安慰我，其實嗰一刻感覺好窩心，好感恩有你呢個好朋友。之前傳你又拍拖又結婚嗰陣，其實我好想你快啲結婚o架！

莊：其實我都想o架！

無暇見面

林：我發覺同你都好似，你本身做模特兒，我係做DJ，大家又會慢慢做其他嘢。好似你又會去電台做主持，電影同廣告你又拍埋。我又會拍劇、電影咁。雖然你有好多工作，但仍然會堅守番自己做模特兒，我就仍然Keep住做DJ。我哋有一樣最得意嘅地方，就係有時見到關於對方嘅嘢，會互send個短訊畀大家。

老友鬼鬼的莊思敏和阿Bob最愛靠短訊分享心事。

阿Bob最希望老友嫁得出，保證對方星途燦爛。

莊：哈哈哈，但我覺得你有一樣仲未習慣嘅，就係面對娛樂新聞啦。我有時見到你畀人針對，你都係會好介意同唔開心，其實take it easy啦！有時都唔可以盡信，所以真係睇開啲啦！

林：多謝！雖然大家好忙，但呢行嘅友情，有時真係未必可以出嚟聚吓！我哋咁耐以嚟，都係認真咁食過一次飯，仲要係你特登嚟我電台嗰邊，其他都係做嘢見到吹水，間唔中再講下電話咁。

莊：我真係知道你工作好忙，而你已經有家庭，如果你未結婚嘅話，我諗係會約多啲。因為想約你嗰陣，都會諗你要陪屋企人。

林：見到你係咁進步，又愈來愈多嘢做，我哋會互相替大家高興。好似嗰陣你拍緊《古惑仔》，知你喺戲入面做梁烈唯女友，我都即刻send個短訊讚你very good，而你留意到我某啲演出時，又會鼓勵番我。我唔知你認唔認同，其實做朋友未必一定要成日出嚟食飯。

盼好友嫁

林：我都好想介紹個男仔畀你識，不過可惜唔夠你高囉。真係勁想你正正經經咁搵番個男仔拍拖……

莊：乜我好唔正經咩？

林：唔係！呢一行唔係你結婚後就咩形象都冇晒，結咗婚都可以工作。我敢保證你結咗婚之後，一定仲勁啲。其實諗落咩男仔會啱你呢？其實有個男仔識得欣賞你，你份人又唔會介意對方係咪靚仔同有錢，我覺得你就OK啦，所以你又真係幾有型！

莊：我都想呀，希望快啲搵到啦！

後記：為Bob捱眼瞓

無論在鏡頭內外，都能感受到林盛斌及莊思敏的「義氣」，話說訪問當日，林盛斌因工作繁忙，故安排早上做訪問，沒想到莊思敏當日化好妝精神奕奕到場，拍攝期間更對林盛斌笑言：「平時我做訪問都係下午，雖然今日好早起身，但冇所謂啦，見係你咋！」說罷後，兩人即齊齊搭膊頭，非常老友。

口述：林盛斌、莊思敏

筆錄：專案組

場地：Dream Cafe