許廷鏗追擊鄭俊弘 爭星夢一哥
無綫早前成立的「星夢娛樂」昨日舉行記者會，由於「星夢」吸納「星煥」，「星煥幫」許廷鏗、吳若希、胡鴻鈞、謝文欣及「星夢幫」鄭俊弘、鄭世豪、羅鈞滿、王君馨及姚兵晒冷撐場。
鍾嘉欣拍劇冇影
而王君馨講感受時即「入戲」爆喊，嚇得眾人目瞪口呆，被封「星夢」一哥鄭俊弘（Fred）卻遭「星煥」一哥許廷鏗（Alfred）追打，Alfred獲坐頭位兼打頭陣上台，而Fred則獲行政總裁何哲圖（Herman）宣布「星夢」首位出碟歌手。
「星煥」一姐鍾嘉欣因拍劇缺席，被傳已簽約的鄭欣宜卻未見影，Herman解釋說：「好多Auntie幫緊佢睇合約細節，要思考得好清楚。」他透露「星煥」明年將不再投資做歌，他說：「同旗下歌手提前終止合約，謝安琪、Super Girls仲同星煥有約，依家傾緊3、4個發展方向。」
Fred與Alfred齊聲否認是「星夢」一哥，Fred說：「唔好咁講，好幸運可以第一個出碟。（會唔會拉姜麗文過檔？）我冇咁嘅能力。」Alfred則說：「我哋邊有爭過。（自動係一哥？）唔係。」而吳若希坦言新約比舊約好，她說：「人工有加，抽佣都少咗。」
文：音樂組