楊怡錫住謙仔 谷人氣爭視后
緋聞男女楊怡和羅仲謙，以及馬國明等昨日為劇集造勢，謙仔玩遊戲被罰時，任評判的楊怡公然維護「愛郎」，鮮有談感情事的楊怡，如此高調晒恩愛，似是想藉此谷人氣，希望在與鍾嘉欣的視后之爭突圍而出。
楊怡、羅仲謙、馬國明及朱千雪等昨日到商場力谷台慶劇《On Call 36小時II》，楊怡與鍾嘉欣都是今年視后大熱，楊怡昨日與謙仔在場晒恩愛，她有可能是想藉此谷人氣，以求增加奪視后勝算。
「男友」讚獨立
謙仔和馬國明等要在活動中做掌上壓，但二人偷雞，做一次當三次，之後謙仔笑說：「我呢啲神枱級係唔郁o架！」結果被監製罰重做一次兼單手做掌上壓，並由楊怡做評判，楊怡即維護「愛郎」：「我做評判？死梗啦！唔使做，下個環節。」
楊怡與粉絲合照時，等候與她合照的謙仔說不敢走近：「怕fans唔鍾意。（尷尬？）係我大件，怕遮住啲fans。」二人受訪時，楊怡不停抹汗兼撥涼，在旁的謙仔未有為楊怡撥涼，他說：「佢好獨立、好叻。（頭先佢錫住你唔使你做掌上壓。）佢想流程快啲，唔係關照。」楊怡即說：「如果冷氣大啲，我叫佢做多幾次。」及後他們稱因工作關係未能一齊看新劇首播。
馬國明缺艷福
馬國明剛於上海拍電影《緣來是遊戲》，他說自己的律師角色其實沒艷福：「啲女仔全部屬於另一個男演員，我只係陪男主角追女仔，冇感情線。（唔開心？）睇住有『人仔』賺就開心。（上多啲內地賺人仔？）一年一套內地劇加幾個廣告就夠。」馬國明又說今年視帝之爭激烈：「好開心可以同張智霖鍊過，有得同前輩爭都開心。」
文：影視組