荷來玩味
時裝除了圖案、顏色和剪裁，另一重要元素莫過於服裝上的裝飾，今期不少女星也穿了大型荷葉邊服裝，peplum、單肩款式樣樣有。荷葉邊本是女人味濃的服裝，peplum在街上最常見，由於掩蓋腰部故令腿顯得更修長，而徐濠縈以個人風格把造型演繹得玩味十足，不會過分lady帶着funny味道，連時裝作家Janice都大讚有驚喜！
徐濠縈
「Peplum通常係好女性化，但阿徐以佢一向嘅風格將peplum演繹到冇咗傳統女性風、唔典型。太陽眼鏡將造型畫龍點睛，將本身lady上衣增加趣味，而且對鞋又充滿funny味道，係心思配搭嘅造型。」
張曼玉
「一向都係style icon，係時尚偶像，對佢嘅品味冇疑問。不過西裝褸過分嚴謹，特別拎住公事包型嘅clutch bag，而且掩蓋咗條裙嘅精髓同頸鏈。」
何倍倩
「畀人好甜蜜、溫柔、優雅淑女感覺，唔會着到好太太look咁典型，條裙上嘅花卉圖案同顏色都好靚，讓眼球好舒服。」
李冰冰
「有點敗筆，唔夠修身顯得腰部好粗，應該戴番條幼belt。條裙太簡約，其實就好似一幅白畫布要添加啲色彩，而啲色彩就係accessories，如大耳環、手鏈。而且寶石綠鞋襯黑色裙會match過白色，反而更出眾。」
T-ARA成員 孝敏
「喺舞台上演出好sharp，上身係tube top好性感，ruffles隨住舞步一齊郁，好sexy lady feel；而且黑色皮本身畀人有危險嘅魅力，充滿性誘惑元素。」
劉嘉玲
「條裙好靚，高貴大方，佢一向行女人味、優雅高貴路線。我認為女性到某一年齡需要唔同美態，而嘉玲絕對有。單肩裝飾係神來之筆，係突出嘅設計，好配合佢嘅個人氣質同身份。」
Profile
王麗儀（Janice Wong），一位時裝作家及博客（blogger），是16年前華語媒體中首位遠赴歐美時裝周報道的時裝編輯。她經常為香港及海外的時裝設計比賽擔任評判，連美國CNN旗下亞洲生活時尚網站及香港Yahoo也分別讚譽她為「香港首位真正的時裝權威」及「時裝文化人」。