張智霖唱好女人 魔童撐父發sing
人氣王張智霖（Chilam）和一眾英皇歌星出席卡啦OK開幕活動，Chilam坦言平時也常到K房唱K，並喜歡唱女性的歌曲：「我幾鍾意唱林憶蓮同王菲啲歌。唔一定要大時大節先去，開心就會成班人有男有女一齊去。（有冇同老婆袁詠儀喺K房合唱過？）梗係有啦！」不過他補充因囝囝（張慕童，魔童）太細未能帶他一同前往：「佢太細個啦，但佢平時都有唱我啲歌，成日唱《你太善良》同《骨膠原》，細路仔學嘢係快啲，我聽到嗰時都覺得好Sweet。」
關心妍排毒
同場還有積極跟老公造人的關心妍（Jade），被問到遲遲未有好消息，她說：「近排試咗個新方法，用電磁波Tune番啲磁場，清吓身體啲毒素，賀爾蒙會好咗！」為演唱會清減不少的鄭融則笑說：「男友成日喺內地做嘢，唔係見得咁多，但係我都會上去探佢。（有冇試過突擊檢查？）哈哈，冇喎！下次可以試吓。不過我對佢有信心嘅，佢都會嚟睇我演唱會。」
泳兒容易醉
鍾舒漫（Sherman）和泳兒（Vincy）在旁大談醉酒經，Sherman更發表大膽言論：「如果我飲醉咗都會試吓借啲意挨落自己鍾意嘅男仔度，不過依家未有。」Vincy不諱言自己是個易醉的人：「我如果醉咗的話同平時性格好唔同，會好多嘢講，捉住人唔畀人返屋企。」
文：音樂組