阿嬌發功爭仔Fiona怒睥
「過氣情敵」薛凱琪及鍾欣潼，前晚出席餐廳開幕派對，原本狀甚老友地頭貼頭玩自拍再雞啄唔斷傾唔停，及至潮牌老闆Eri Chu殺到，兩女忽然「爭寵」，兩女一男愈傾愈有火，嚇到Eri火速離開。
曾經先後和房祖名傳緋聞的薛凱琪（Fiona）和鍾欣潼（阿嬌），前晚齊齊應邀出席意大利餐廳Sheleter Italian Bar & Restaurant開幕派對，這兩個「過氣情敵」前後腳到場，碰面後即雞啄唔斷，並且大方地拍照留念，兩人毫無芥蒂地結伴而坐，同時更各自取出電話頭貼頭玩自拍。
潮牌老闆速閃
狀甚老友的Fiona和阿嬌，原本傾得頗為開心，未幾無綫咪神梁政珏的前男友、潮牌老闆Eri Chu出現，只見他熱情地和曾經傳過緋聞的Fiona打招呼，兩人投契地說個不停，Fiona被氹到擘大口大笑，然後又拿出電話讓Eri看，兩人細聲講大聲笑，一度被冷落在一邊的阿嬌亦忽然發功，主動地加入聊天，向來和阿嬌熟落的Eri亦立即轉軚，眼見兩人傾得投入，Fiona突然黑面，更相當有火地怒睥阿嬌，有感現場氣氛不對，Eri被嚇到火速離開。
楊明連環攬女
另外，早前和女友結婚前「臨門撻Q」的楊明，前晚亦同場出現，並於場內連環攬女，先和吊帶低胸性感打扮的「魔鬼女」攬埋，繼而又再和無綫姐仔趙希洛攬攬，相當有異性緣。除此之外，靚仔關楚耀亦於場內非常受歡迎，不時被人要求合照，成功做了全晚人肉布景板。
文、攝：追蹤組