吳國敬萬聖節贈慶遭醉街女友喪鬧

吳國敬趁前晚萬聖節與圈外女友Elaine到中環狂歡，兩人雖無特別打扮，但同樣由頭黑到落腳的造型，明顯悉心襯過。至昨日凌晨一時許，兩人忽然「黑面神」上身，被發現在中環四寶大廈一樓梯內吵大鑊。見滿身酒氣的Elaine坐在樓梯上不斷向阿敬「咆哮」，阿敬則一直頭耷耷在女友面前「罰企」，情緒激動的Elaine六度大喝「算啦」，又四度以堅定眼神望住阿敬說：「你得o架！」大發晦氣。

發現被影獨自閃人

原本阿敬一直無奈地聽女友發洩，但當女友第四次大嗌「你得o架」後，本來平靜的阿敬開始激動，反客為主向女友說教，並勞氣地捽眼兼撥頭髮，最後更「冇咁好氣」地雙手撐在樓梯扶手上。躁到爆的阿敬欲除外套「降溫」時，才發現被全程直擊嗌交過程，他即「收火」穿回外套獨自速逃，被撇下的Elaine坐在樓梯抱頭痛哭，認真陰功豬！

吳國敬與Elaine平時非常恩愛，但原來都是火爆之人。（資料圖片）	Elaine曾被拍得向吳國敬動粗。	被女友噴到一面屁的吳國敬，意圖除外套「降溫」。

阿敬昨日接受電話訪問，直認萬聖節與女友和其他友人到中環開party，但故作輕鬆地否認和女友嘈交：「佢飲醉咗酒，咩嗌交啫？佢醉咗咪坐喺樓梯抖吓，我出去截的士。我都知有人偷拍，我都滾滾哋o架嗰時！」他又指女友酒量不佳，故兩人平時都少飲酒，前晚為了盡興才會「飲大咗」，並說：「其實我自己都有少少醉，不過知佢醉咗梗係照顧佢先，所以咪去截的士。」似乎想力證與女友感情無異。

男友速逃後，Elaine瑟縮在樓梯飲泣。	李思捷到場不久便離開，與春卷無緣碰面。	春卷前晚全程黐實錢國偉。

其實48歲的阿敬和女友Elaine同屬火爆一族，四年前兩人在酒吧內爭執後，女方更當眾用手臂橫批男友面部，慘食蠻拳的阿敬痛得面容扭曲地掩鼻，但他事後仍袒護「野蠻女友」，故今次阿敬與女友只「動口不動手」的耍花槍實屬小兒科。

「思春」同場不相見

另一邊廂，分手已一段日子的李思捷和王宝宝（春卷），萬聖節當晚在一意大利餐廳同場卻無緣相見。負責接待賓客的春卷身穿性感tube dress，甫見錢國偉到場，她即變「貼身膏藥」黐實對方，兩人雞啄唔斷。而李思捷到場後只逗留了一會便走人，與舊愛緣慳一面。

文、攝：追蹤組