關之琳破格英雌
時裝革命是要經時間起義，要講的是pantsuit，曾幾何時是紳士名流的身上衣，低下層與女人是禁穿的，多得已故時裝大師Coco Chanel與Christian Dior等出現，先後創製出男性化西裝外套，將當時的禁忌打破，至今「雌雄同體」造型也成為潮流標記之一。近期一眾女星都齊齊pantsuit上陣，星級造型師郭慶彬（Ricky）大讚陳慧琳演繹出官仔骨骨型格，劉嘉玲則剛中帶柔，卻不及大美人關之琳的黑白豹紋配搭攞滿分！
關之琳
傳統西裝褸款都係長袖或褶袖，呢款無袖設計好有新鮮感，麒麟臂就千祈唔好咁着，否則自暴其短；最精彩係黑白豹紋背心，營造黑白層次感，又唔老餅，攞滿分！
劉嘉玲
我好鍾意女仔樣靚，着起西裝套裝時更能凸顯出剛中帶柔嘅味道，最襯係佢all back髮型，令造型更乾淨利落，好有瀟灑嘅男子氣概。
陳慧琳
一身tailoring設計好有時尚感，佢骨架完全撐得起，最型係佢gel起個頭，呢個官仔骨骨嘅造型永遠唔過時，加埋對尖頭鞋，絕對加晒分。
泰迪史雲頓
套裝理應一眼望落去好OL look，但佢一頭金短髮加埋高挑身形又救番造型，加上佢氣質同高挑身形搭夠，型到震，完全帶出佢冷傲英姿。
姬摩絲
一頭金髮襯起佢全黑打扮好型，如果內裏襯恤衫會好formal，但佢就好醒襯件低胸裝，中性得嚟好性感，clutch同涼鞋配搭令造型更有型。
Coco Rocha
全黑裝扮好易令人覺得好悶同冇生氣，但佢嗰個紅嘴係一身造型亮點，加埋佢剪咗個短髮好清爽，整體感覺超有型，做到雌雄同體嘅感覺。
Profile
著名星級造型師郭慶彬（Ricky）曾遠赴米蘭與巴黎時裝周，出席品牌有Max Mara、Chanel、Valentino、Gucci等品牌，也曾被邀在中國時尚節目《美麗俏佳人》擔任嘉賓主持，近年也被各大品牌邀請客串造型顧問，Ricky亦曾為李冰冰、吳君如與張惠妹等擔任造型師。