鄭俊弘為面子 唔輸得

自《星夢傳奇》播出第一集，鄭俊弘已率先跑出，由寂寂無聞的茄哩啡，一躍成為萬眾矚目的人物，最後他更過關斬將，以16萬票數壓倒姿態勝過其他對手。整個比賽，鄭俊弘流下了一公升的男兒淚，感動的不是吐了十多年的烏氣，而是可以在媽媽面前，盡情表現愛音樂。

「知道有咁多人支持我，我好感動，以前會覺得得自己一個，一路做一路拚搏，但原來係有咁多人欣賞我！今次媽咪喺現場睇我，可以畀媽咪見到我有少少成績，過往佢都係隔住電視機，或者隔一排先睇到我嘅演出，以前媽咪成日話我：『唔好成日匿埋喺房度彈結他！』但事實上，我真係好鍾意彈結他，依家可以畀佢睇到我對音樂嘅熱誠，所以好開心！」

鄭俊弘奪冠後，與母親相擁流淚。

鄭俊弘

身心疲累唔再參賽

雖然鄭俊弘表面上看似與世無爭，不過打從骨子裏，他也有顆「唔輸得」的決心，即使比賽取得高分數，他也要想盡辦法攀得更高，因為巫啟賢是他師傅，故他亦不能失禮。鄭俊弘背負的壓力如此多，難怪再叫他參加比賽，他也自覺身心俱疲。

首集《星夢》獲得最高分的鄭俊弘激動落淚。	鄭俊弘當眾下跪拜巫啟賢為師。	眼見有一班支持者，鄭俊弘覺得非常窩心，再也不是得自己一個。

「參加《星夢傳奇》其實都有啲壓力，都係來自自己嘅壓力。雖然話唔諗分數，但當得到低分，潛意識都有少少唔舒服。而我拜完師之後，每當巫老師（巫啟賢）嚟做評判，我就會有壓力，因為佢嘅要求比較嚴，我希望做到好成績，唔想做得差、落佢面！如果你問我，仲會唔會參加歌唱比賽，我諗我唔會，因為參加得，就要有個心理準備會畀人Out。我6歲開始學功夫，8歲已經開始過比賽嘅生活，去到玩音樂唱歌又比賽，而且我逢比賽必嘔，喺《星夢傳奇》入四強嗰陣，我直程緊張到胃抽筋，都有少少辛苦！」

想同舅父開Band騷

鄭俊弘的「唔輸得」性格，其實是受去世的公公所影響，公公教曉他，世上無難事，只要堅持，默默耕耘，成功定必離他不遠。可惜天意弄人，待鄭俊弘成功時，卻未能與公公分享喜悅。他現時最想的，莫過於可以跟啟蒙他愛音樂的舅父來一場Band Show，瘋狂地玩音樂！

「其實喺公公身上，我學識努力奮鬥，一份工搞唔掂，就打兩份工，一定唔會餓死。因為佢係鄉下搭船去舊金山嗰一代，經歷過世界大戰，佢成日都叫我唔好放棄，要努力工作、工作、工作。至於舅父方面，兩年前我睇過佢做一場音樂騷，佢無端端叫我上台，然後畀支結他我，叫我一齊Jam歌！呢個係我其中一個夢想，真係好想同舅父有場騷，我咁鍾意夾Band，就係因為感覺到自己好似返咗屋企咁！」

後記：「突襲」記者

某一集《星夢傳奇》，鄭俊弘自爆曾在拍戲時要輕薄一名女子，令本是怕醜仔的他無所適從。提起此事，鄭俊弘笑笑口說：「如果再畀我做，我諗我會放啲嘅，嗰陣啱啱藝訓班畢業，乜都唔識，乜都唔夠膽去做。」當再追問如何「放啲」時，他出其不意在眾人面前張牙舞爪，恍如《怪獸大學》的毛毛一樣，令在場記者嚇一跳！證明「唔輸得」的鄭俊弘更勇於突破。