鄧智偉劈炮翹起TVB 投靠林峯

無綫行政主席梁乃鵬這邊廂揚言要培育TVB大家庭文化，那邊廂無綫音樂總監鄧智偉前晚卻連同四位助手遞信辭職，更即日生效走人，鄧昨在微博感性留言談離職。事件有傳與派系鬥爭有關，事關鄧智偉乃樂易玲愛將，但無綫新成立的唱片公司星夢娛樂卻由余詠珊老公何哲圖入主，未知鄧智偉是否因此而不滿並萌生去意。

勸下屬留低

鄧智偉昨坦承辭職，強調要離開工作了12年的崗位非常不捨得：「鬥爭咗大半年，無綫有挽留，但我最後都係決定離職。（傳你辭職同何哲圖入主星夢有關？）既然有咁適合嘅人選，我終於都可以放心離開，我想出去外面闖，但好多謝咁多年來樂小姐對我嘅提拔。我知佢好錫我，但佢都想我有好發展。（你四個下屬跟埋你一齊遞信？）我何德何能？我係自己辭職，但佢哋都話要辭，我仲勸緊佢哋，佢哋話跟慣我，想一齊出去闖。」

不過，亦有傳鄧智偉離巢，是因好友林峯包起他搞公司大展拳腳，對此鄧智偉否認會跳槽，又笑笑口否認與林峯的傳言：「唔會啦，好朋友邊有話邊個包邊個！（合組公司？）未傾實，但我想先獨立，見識吓世界！已經落實咗啲內地電影配樂工作，唔會諗跳槽其他公司。雖然離開TVB，或者會轉另一種方式再合作呢。」

有傳余詠珊（左）轉投無綫後，就與樂易玲不和。	林峯昨晚表示會繼續與鄧智偉合作。	何哲圖將加盟無綫，有傳這是鄧智偉請辭的導火線。

余詠珊對於有傳鄧智偉離職，是她老公何哲圖入主星夢娛樂所致，她說：「假設嘅嘢，唔想講。（何哲圖入主，對鄧有影響？）唔覺得，或者佢想有多啲空間發展。（何哲圖入主會令佢冇空間？）唔會，呢啲你問番佢，總之唔係不歡而散，呢個圈好多時都出出入入，何哲圖管唱片經營，又唔係負責作曲。」

樂易玲對有傳鄧智偉因何哲圖而辭職，她說：「何哲圖入嚟，有人睇住，鄧智偉可以放心辭職。（傳有派系鬥爭？）傻啦，唔好咁傳，李生（無綫集團總經理李寶安）都好關心呢啲傳聞，我哋都係管理層，好應該同一信念，做好工作，其實呢啲傳言都唔係依家先有。」她再三盛讚鄧智偉有才華，並指現時只收到一封辭職信，鄧正力勸下屬再三考慮辭職事。

林峯、黃宗澤及吳卓羲曾與鄧智偉合作無間，對於鄧離職，林峯昨晚出席活動時說：「喺音樂上我會繼續搵鄧智偉合作。（公司要你換班底咁點？）我之前都有同好多外面嘅音樂人合作。（傳佢走係因為何哲圖？）唔關事，我冇聽佢提過。（你同佢合組公司？）唔係咁簡單，出面已經有好多唱片公司。」

宗澤拒慶祝

黃宗澤則對鄧請辭感可惜，對有傳鄧是因派系鬥爭而離職，他說：「我拍戲咋，唔係高層，唔理。創作填詞冇界限，佢出咗去都可以合作，我會同佢保持良好合作關係。（為佢搞歡送會？）呢件事唔係好值得慶祝，遲啲約食飯見啦。」吳卓羲對於為他寫下名曲《別怪她》的鄧智偉離職，原來他早已收到風，他說：「樂小姐話咗畀我知，（傳有派系鬥爭？）我唔知，冇聽過，但我梗撐鄧智偉。」

文：影視組