雨僑許亦妮big走Jeana
陳靜（DaDa）月初在微博突然宣布退出幕前，許亦妮、雨僑和何佩瑜（Jeana）在新片中誰是「女一號」？可謂爭崩頭！昨日新片終於開鏡，眾女性感鬥搶鏡，雨僑不動聲色與許亦妮成功企正中間，將Jeana成功逼退。雨僑更承認取替了DaDa拍揸胸戲，暗示爭得「女一號」之位，許亦妮也只是頂替她原本的角色而已。
昨日許亦妮、雨僑、何佩瑜、夏尉喻、蕭美卡、郭穎兒、Celia K.和蔚雨芯等，以性感造型出席電影《喜愛夜蒲3》重新洗牌開鏡拜神儀式。眾女衣着性感大騷事業線，許亦妮拜神大合照時佔盡中間有利位置，雨僑亦不甘示弱逐步進攻，最終成功與許亦妮睇齊，Jeana則慘被擠到後排。
等睇許亦妮好戲
DaDa退演到底誰是電影的女主角？雨僑語帶雙關的說：「有幾條線嘅，我原本個角色畀咗許亦妮。（你公司話你取代DaDa喎。）橋段有改動過，我床戲係多咗，原本DaDa同韓國男模大戰場戲變咗我做。（被揸胸戲？）係，我接受咗。（許亦妮威脅你？）我都好期待睇吓佢點演我原本個角色。」對於有報道指許亦妮做女主角，許亦妮說：「梗係唔係，唔好咁講，加咗啲戲啫，冇話邊個取代邊個，邊個做女主角都冇所謂。」雨僑其後再在微博發功，向Jeana留言「我應該要開始憎你，但我現在還是滿喜歡你。」
Jeana引誘林德信
同場35D巨胸「寸嘴Barbie」夏尉喻經洗牌後戲份被加，她坦言感到幸運和感恩：「一直冇刻意主動爭取，做演員好被動。DaDa退演都覺得好可惜。」而慘遭犧牲戲份被刪的蕭美卡，則感到不開心，會否埋怨DaDa？她說不會，大家未有交流過。
真空到場的Jeana在戲中與林德信有場濕吻戲，她笑言已吩咐對方留鬚：「我鍾意佢有男人味多過大隻，我係小三會引誘佢。」Jeana承認與DaDa有聯絡，透露她身在澳洲但代為否認有孕：「香港畀佢好大壓力，少少抑鬱。佢喺嗰邊放鬆緊自己。（幾時返港？）唔知。（後悔？）未留意。作為朋友立場想佢好番，快啲返香港。下次唔好再亂聽人意見。（有人建議、慫恿DaDa退出？）唔知呀。」
導演錢國偉則表示並非有人取代DaDa，各人戲份差不多，感激Jeana加入，他說施念慈已多次致電表示對不起：「大家都唔想，知佢都好頭痛唔知點算。佢哋仲有長約，唔知佢會唔會出尋人啟事。（追討賠償中？）會循法律途徑。（永不錄用DaDa？）冇諗呢啲。」昨日出席的男演員還有林德信、王宗堯、應昌佑、陳柏宇，王宗堯傍晚在微博內以英文意有所指的留言：「只要仍留在遊戲內，始終有再勝出的一天！」
文：影視組