官恩娜活的見證︰我要衝刺

樂天知命

官恩娜是以歌手身份入行，但在觀眾眼中她只是一個演員。入行10多年，她當然也經歷過低潮，不過自命樂天的她並沒有因此自暴自棄，反而學懂珍惜每個機會，為未來作好準備。

我入行超過10年，之前有啲人或者會唔記得我嘅歌手身份，淨係覺得我係一個演員，可能大家睇我嘅焦點會放咗喺我唱歌以外嘅嘢度，但其實自己一直無停過出唱片，我覺得同時間做唔同嘅工作，有其他方面嘅嘗試同發展都好重要，我都想做一個全面啲嘅Artist，抓緊每個工作機會。最近簽咗新唱片公司，都會放番多啲時間喺音樂方面，除咗唱歌，有機會嘅話都想試吓做唱作歌手，嚟緊我想創作歌曲，填詞暫時就未有打算，我啲詞應該麻麻。

入行咁多年，期間當然亦有經歷過低潮，不過就算係喺最唔開心嘅時候，自己都會「的」番自己起身。我嘅缺點亦可以話係我嘅優點，我個人好心急，唔鍾意啲負面情緒，覺得啲負面情緒阻住晒令到自己停咗落嚟，所以我會叫自己唔好諗啲唔開心嘅嘢，發現咁樣原來真係有用，叫自己唔諗原來真係可以控制到唔諗。我係一個樂天嘅人，凡事都會覺得冇乜嘢大不了，試問有咩比生命更重要？一咁諗就會唔再咁執着，會睇得開。近幾年我感覺到自己好適應喺工作上，所有嘢都好Smooth，明白到咩都要Balance，亦都成長咗好多。

在圈中經歷高低起伏，不過官恩娜鬥心不死，堅持繼續衝刺。	官恩娜與外籍男友感情穩定，不過她未有結婚打算。	官恩娜有妙法遏止消極情緒。

改變人生觀

入呢行除咗可以有自己喜愛嘅事業，我仲學識咗珍惜所擁有嘅嘢，呢種諗法係從我嘅精神同體力嘅鍛煉上領悟出嚟嘅，當中艱苦嘅過程亦證明咗我真係活過，個人自然亦都睇開咗。有時會面對啲唔好嘅新聞、唔係事實嘅報道同埋會畀人批評，呢啲都可以訓練我自己更加堅毅不屈，當係磨練自己，可以為我未來嘅人生作更好嘅準備，我入行由最初到依家可以話係成個人生觀改變咗。

愛多元化

一直熱愛表演的官恩娜，不斷嘗試多元化的工作，如唱歌、演戲又或者拍廣告等，每次工作都像挑戰自己，只要見到成果是好的，就算再辛苦她都願意不惜一切完成每項工作。

其實無論唱歌、演戲又或者拍廣告等，樣樣工作我都鍾意，都係表演嘅一種，我啱啱就拍咗部港台嘅劇集，我飾演一個公務員，個角色係好認真嘅人，對我嚟講係好大挑戰。早前我又幫一套卡通片配音，我都好鍾意做配音。最近我仲拍咗個沐浴露廣告，露吓肩、露吓腿免不了，不過都包晒浴巾嘅，主題係Cover girl，要表現出健康、自信同開心，絕對唔會刻意賣弄性感。拍之前都同公司商量過，自己當然亦無問題，仲好開心有好多Sponsor。自己幕前演出嘅性感尺度最緊要係要配合件事，過分刻意暴露梗係唔得，今次嘅廣告反而無出浴鏡頭。拍攝當日都有少少攰，嗰朝6點就要起身Set頭、化妝，拍到夜晚先拍完，期間我要不停咁轉圈，不過睇到出嚟嘅效果好就會覺得辛苦都係值得，我係一個辛苦都唔會放棄，決定咗做好件事就要努力完成嘅人。

鍾意大自然

現實生活中我都做咗接近100次Cover girl，每次都好有滿足感，都好期待睇到個封面出版，因為每次個主題、造型都唔同，好有新鮮感。我覺得做Cover girl一定要有自信，同埋可以配合到主題所要求嘅形象，當然皮膚要靚，要夠透亮，即係要白裏透紅。保養方面就會食好多水果同埋勁飲水，亦都好注重皮膚嘅清潔同營養。平時工作壓力大，識得減壓都好緊要，我一有時間就會抖吓，瞓吓覺，好鍾意浸浴，會去草地散步，放吓狗，盡量放鬆心情，我鍾意大自然，喺大自然嘅環境人都開心啲。

有機會我都想拍關於食嘅廣告，我好鍾意食嘢，食嘢可以令人心情偷快。我都算係一個Happy girl，之前我拍Harlem shake都係為咗搞吓笑，同埋將開心帶畀其他人，希望可以感染同鼓勵到人，我唔介意扮啲搞鬼造型，我好Open去扮演唔同嘅角色，鍾意啲搞笑嘢，覺得好好玩。

一切隨緣

官恩娜坦言同男朋友已拍拖多年，但大家都未有結婚和生BB嘅衝動同計劃，加上爹哋媽咪從未畀過壓力，所以她現在想繼續專心工作，好好享受目前的一切。

至於有無諗幾時要結婚生BB？我同拍拖四年幾嘅男朋友感情穩定，但就未有呢個計劃，細個時反而有諗，記得初戀時有諗自己要20歲結婚，依家就會覺得再過多幾年先。結婚呢啲嘢，個人感受都好緊要，我唔會因為外來嘅壓力而做，我自己唔急，屋企人亦都無催我，爹哋媽咪超級Open minded。生BB就要睇有無呢種福氣同緣分。總之依家好想繼續專心工作，同埋仲未有想結婚同生BB嘅感覺，好享受目前嘅生活。

文：張嘉敏

服裝：2068

Hair by Eve Chiu@Queen's Private i