阿佘豪氣唔吼富二代
佘詩曼（阿佘）昨與黎耀祥以嘉賓身份出席「四季會珠寶鑽飾專門店」剪綵，二人齊齊戴上逾百卡鑽飾上陣，相當「耀眼」。投資有道成小富婆的她，直言愛將「私己錢」留作買樓之用。談到鑽飾收藏，阿佘坦言：「唔捨得呀，咁貴！買樓好似保值啲，活動場面有贊助戴吓已經好滿足。（留番男友送？）都好喎，冇試過有咁厚禮，唔鍾意用錢去衡量感情事。（喺內地有富二代追求？）我唔鍾意太細個，況且識人都唔知人哋係咪好有錢，上進心比較緊要。」
談到過氣緋聞男友鄭嘉穎坦言刻下甚麼都不缺，只缺好老婆，阿佘聞言即笑謂：「唔回應嘞，都想佢有個好老婆。（你恨有好老公？）呢方面隨緣啦。」
鎮宇滄桑味吸引
談到《衝上雲霄II》「振興」無綫收視，阿佘直言打算稍後一口氣觀看：「可能10年大家都等咗好耐，況且咁多靚仔同靚景喎。（返無綫拍劇？）傾緊啦，最快明年1月。」
同場的祥仔談到張智霖（Chilam）與吳鎮宇魅力席捲全城，連奪3屆視帝的他承認今年出現「勁敵」：「Chilam靚仔，鎮宇啲滄桑味又好吸引我，佢淨係望住粒糖做戲已經殺死人，呢啲咪至高境界囉。」他更搞笑謂自己都恨演機師，不過珠玉在前，都擔心有比較，惟有「改行」想接演醫生角色。
文：影視組