黃貫中拖谷肚朱茵睇婦科
朱茵自去年榮升人母後，眼見女兒叉燒包愈大愈可愛，跟老公黃貫中（Paul）都想為女兒搵個伴追番個仔，以湊成「好」字。日前腹部微隆的朱茵被記者撞破中環睇婦科，Paul全程表現緊張拖到實，問到是否有喜訊兩人則不作回應。
藝人朱茵去年10月誕下女兒黃鶯（叉燒包）後，一直閉關湊女鮮有在公開場合露面，直到近日修身成功才開始現身公開活動，每次受訪朱茵提及女兒都露出幸福的笑容，直認女兒是兩公婆的掌上明珠，即使叉燒包嘔奶亦得意過人，連一向脾氣火爆的Paul見到女兒亦乖乖收火，朱茵更笑老公：「佢望住個女就溶晒，對住我都冇咁冧。」
天雨路滑慢慢行
愛錫妻女的Paul每天早出晚歸工作搵奶粉錢，閒時就化身攝影師為女兒拍照，並將叉燒包的趣致照片上載微博大晒幸福。雖然Paul曾笑言若然再生多個，自己會短幾年命，其實他是錫住老婆，不想她太操勞，但BB魔力無窮，眼見八個月大的叉燒包愈大愈可愛，遂有意趁年輕再追個仔，湊成好字！
日前記者發現頭戴cap帽、踢人字拖的Paul和朱茵現身中環皇后大道中，穿着牛仔褸配低胸短裙、腳踏厚底波鞋的她腹部驚現微隆，與早前出席活動已回復產前索爆身段大有距離。加上當天下着微微細雨，手持雨傘的Paul全程傍實孕味甚濃的太太小心慢慢行。當Paul發現記者後唯恐嚇親老婆，即緊張拖實朱茵的手，問到兩人去向，朱茵帶笑並有禮貌地說：「唔好意思！」然後就在Paul的攙扶下踏上樓梯，步進開滿名牌婦科診所的中建大廈。
避記者兜遠路
大約個半小時後兩人才離開大廈，未知是否想避開記者追訪，兩人沒有由原路離開，反而兜大圈行天橋走到對面的新世界大廈再落地面，朱茵全程翹實Paul的手臂，慢行到附近的長江中心取車離開。
就朱茵疑似再度懷孕一事求證其經理人，他說：「咁奇怪？我啱啱先返香港，未收到呢個消息。」對於兩人出入診所林立的大廈疑似看婦科，經理人稱：「係咪行街呀？可能係行街買衫，Paul成日都叫朱茵陪佢買衫。可能大家覺得佢哋個BB太得意，所以大家心急咗啦。」
文：音樂組