鄭中基轉動作演員任人砌
喜劇演員鄭中基事隔多年再演搞笑臥底幹探，已為人父的他近年甚少拍親熱戲，他否認太太余思敏下禁制令，但笑言想開創新戲路做「動作演員」，但主力是被打。
金像獎最佳男配角鄭中基（Ronald）、女歌手雨僑、莊思敏、石詠莉、張暖雅及導演胡耀輝等昨日為新片《猛龍特囧》試造型，向來慷慨騷身材的莊思敏及張暖雅齊齊封胸，雨僑則憑騎呢look搶鏡，首次任女主角的她一身七彩打扮，戴上千五度遠視眼鏡，猶如小雲一樣，期間Ronald搶走其眼鏡試戴，亦被誇張遠視度數嚇親。
怒髮衝冠的Ronald身穿短袖Tee騷手臂紋身，他表示新片日內開拍，將在香港及上海取景，今次再演臥底幹探，問到會否除衫騷肌？他說：「我好多紋身，要做差人唔方便除，不過今次角色流流哋，冇咩開槍場面，只係自以為自己好勁。」至於片中有否感情線？他笑言跟導演兼演員胡耀輝有段由細玩到大的兄弟情，提到近年甚少與女星演感情戲，他承認說：「係啦！可能我啲感情冇咩說服力。（局限咗？）惟有加多啲動作，一於開新血路，依家變咗動作演員，係畀人打嘅動作演員。（太太唔畀？）唔會！做嘢啫！（避忌？）睇需要啦！上次拍戲都有同薛凱琪演一Pair，但主要係搞笑。」
雨僑女追男
而雨僑透露在片中自小暗戀Ronald，女追男但不成功，今次Sell可愛不用行性感，並表示戴上遠視眼鏡後視力模糊一片：「排戲嗰陣要捉鄭中基，我都捉錯咗石詠莉。（驚摸錯地方？）最怕撞親人咋！本身安排我配近視隱形眼鏡平衡番，但我適應唔到，好暈，戴十秒就嘔。」
文：影視組