阿Sa谷碟中頭獎
蔡卓妍（阿Sa）昨日在酷熱天氣警告下出席戶外舉行的新碟記者會，剛由印度返港的她甫落機即飛撲返家換衫，因太心急拉大門結果撞傷左眉心，阿Sa笑言適逢出碟日當中頭獎，望「紅」運當頭！
阿Sa日前與經理人霍汶希（Mani）飛到印度與大寶法王慶生，昨日返港出席戶外舉行的新碟《Blooming》記者會，雖然天文台發出酷熱警告，但無損數十歌迷在烈日當空下支持偶像，身為新碟監製郭偉亮（Eric Kwok）亦現身打氣，Mani送上鮮花兼搞Gag說：「希望下一站影后係你。」
新潮耳機贈法王
以連身短裙示人的阿Sa熱到汗流浹背，她說：「嚟到先知喺室外，好想換背心。（換泳衣？）驚嚇親你，我好『猛料』。」她透露為趕出席活動，遭家中大門撞傷眉心：「拉門唔小心撞到，今日新碟推出，當『紅』運當頭同中頭獎啦！」阿Sa表示送了耳機給28歲的大寶法王，她說：「佢1985年出世，原本諗住送畫，見佢咁後生咪送耳機。（有咩人去？）王菲、劉嘉玲、鍾鎮濤一家，不過大家唔同時段。」
Eric自嘲出「頭」天
同場的Eric Kwok日前不小心上載一張赤裸下身曬太陽照片到微博，他解釋說：「以為手機影完會Cut頭同尾，點知上載完再睇番先見到『大草原』同『小山頭』。」他隨即笑說：「小弟終於有出頭天，我係西方式，有割包皮好乾淨。（老婆葉佩雯有咩反應？）佢話好唔抵，原本得佢睇嘅嘢，依家全世界睇晒。」
採訪：音樂組