朱璇發高燒照開工

藝人朱璇及陳倩揚昨日出席美容活動,穿上低胸連身裙的朱璇原來發燒兼喉嚨發炎要打針才能出席活動,她直言:「發燒39度,所以今日講嘢怪怪哋,今次有藉口喇,我一直都有學廣東話,但可能冇語言天分,法文反而仲簡單,廣東話嗰九個音我覺得差唔多。」她更透露想減走包包臉,但不會整容,曾考慮過打針:「但說服唔到自己,變太多就唔係自己,我由細到大都包包臉似波棒糖,所以要用頭髮遮住。」

另外,擔任司儀的陳倩揚則透露《衝上雲霄2》就快播出,劇中飾馬國明女友,她表示該劇是久休復出的作品:「同馬明拍劇好有新鮮感,馬明仲話下次拍劇要再續前緣。」她更笑言正幫馬國明物色女友。