高Ling晒線街坊爆粗鬧
藝人高海寧（高Ling）、徐子珊、阮兆祥、林子善昨晨在新蒲崗一商場拍攝新劇《My盛lady》。在戲中飾演o靚模的高Ling先換上deep v小背心加超短裙，大露事業線、23吋纖腰和長腿派傳單，完美身段表露無遺！除了劇組安排的假龍友，現場更有街坊真龍友，拿住電話在距離高Ling不足2米說：「靚女，望過嚟！」但因高Ling要專注拍攝而沒有理會對方，該街坊即細聲講粗口謂：「唔×影啦！」受訪時，她就表示：「如果遠距離、有禮貌嘅都ok，但啱啱追住影就有少少嚇親！」
之後高Ling再換上一套螢光粉紅色衫，繼續暴露，不過今次要搞笑地加上一個巨型唇膏頭套，非常可愛，高Ling亦不怕騎呢，對街坊要求合照都有求必應，非常抵讚！不過，高Ling就不幸被唇膏頭套搞到膝頭敏感紅腫，當記者爭相拍照時，她就求饒指：「唔好影啦，好核突！」她又笑言戴頭套雖熱，但可幫助去水腫，果然愛靚唔愛命！
子珊自認身材較遜
而日前不慎跌傷腰骨的子珊，就繼續穿上高踭鞋，但現場所見她健步如飛。問到子珊會否怕被高Ling的惹火身材搶風頭，她非常謙虛：「佢真係好勇敢、好搏！（喺戲度你有冇性感造型？）都有啲露吓腰、着Bra top咁，但點性感都冇佢嘅效果。（你有演技！）冇呀！身材同演技都冇！（你係港姐冠軍！）咁我sell平均！」
文：影視組