徐濠縈揸車(火羅)爆 情急抵「瀨」
(火羅)事人人有，當事情發生時確實尷尬萬分，但事後回想起只係得啖笑。徐濠縈自爆(火羅)事，提起都瘀死，她在車上肚痛，未能及時上洗手間，結果當場「瀨」。而Amanda S.則因着tube dress跳舞時整條裙甩咗，當眾出醜！
徐濠縈
「有一次揸緊車時肚痛想『瀨』，之前已經忍咗好耐，因為仲要車個朋友返屋企，之後啲衫褲全部唔要得，諗番都覺得尷尬！」
周汶錡
「試過着對斗零踭高鞋，行行吓路個踭kick住咗喺個坑渠窿度，搞到赤腳企喺坑渠，徒手扯番對鞋出嚟，勁尷尬！」
Amanda S.
「我18歲嗰年着咗條tube dress喺歐洲參加一個ball，點知跳跳吓舞成條裙跣咗落嚟，我惟有笑住着番條裙，不過好在係喺歐洲，所以冇乜人理。」
莊思敏
「我近期啱啱send錯message畀人，內容仲要係一啲公事上嘅機密嘢。不過好彩send錯咗畀唔涉及嗰件事嘅人，我惟有同佢講當冇睇過個message。」
汪圓圓
「記得八歲時去camp，沖完涼用毛巾包住上床攞衫，因為我瞓上格床，要一手揪住毛巾，一手爬上去。點知唔小心甩手，條毛巾跌咗落地，畀個女同房見到我嘅pat pat，真尷尬。」
雨僑
「有次同幾個女仔一齊着比堅尼出席電影宣傳，其實我唔識游水，點知個活動要我哋落水，我上番水嗰陣，個妝溶晒，個髻又甩埋，但係其他女仔就好靚咁游完上番水，嗰刻我真係覺得尷尬。」
湛琪清
「上次遠距離見到偶像郭富城，我好鍾意佢，即時面都紅晒，但我又唔敢上前同佢講嘢或要求合照，成個怕醜小fans咁！」
文詠珊
「我都試過唔小心差錯腳落坑渠，成個鞋踭kick住咗，拎番出嚟鞋踭已經爛咗，要拐吓拐吓咁行！」