黃日華怒碎玻璃闢緋聞
有「噴火華」之稱的黃日華，1995年5月因為與蔡少芬合拍無綫劇集《包青天》而傳出緋聞，華哥因有感被屈，盛怒下一拳打向化妝室的玻璃門洩憤，不料右手掌及大拇指被鎅傷，留下吋半長傷口，血流如注，即時送院治理，更縫了兩針，事件足以反映黃日華的火爆性格。
黃日華早前接受本報訪問談起這段陳年往事，他說：「嗰時好忟，我根本都冇做過，被人屈好難頂，緋聞打爛我個齋缽，嗰時傳緋聞好嚴重，我嬲起上嚟一拳打咗落塊玻璃度洩憤。依家諗番成件事，都覺得自己當時好唔識諗，連狄龍（當時在《包青天》中飾演包大人）都話我：『你整親自己，幾唔抵呢！』不過件事之後，拍劇嗰時我唔敢再同蔡少芬有任何交流，費事被人攞嚟炒作！」
