莊思敏 陳嘉桓女人堆 男人經
陳嘉桓（Rose）與好姊妹莊思敏暢談感情路，Rose認定「靚仔冇本心」寧愛熟男不要花o靚，莊思敏與吳浩康再見亦是朋友，同行拍拖雖然最後分手告終，莊思敏坦言無懼將來再次與同行相愛，繼續勇敢愛下去。
型男正 唔長久
陳：記唔記得我哋係點相識？
莊：我記得係識你媽咪先，有次我要訪問化妝師，佢就係其中一個嘉賓，之後就識埋你，當時完全唔信你哋係兩母女，你嗰陣得16歲，第一個感覺係完全唔似16歲，你畀人感覺成熟好多，同埋見你做嘢都吸收得快，身邊又有好多人提點，絕對幫到你適應呢個圈。
陳：我哋之前雖然成日喺活動或者行騷撞到，但直至拍戲先真正開始熟。拍戲嘅相處時間長，大家要不停咁對住，我啦、你啦、蝦頭、方皓文，成班好似八婆咁不斷傾偈，咩都講一餐。
莊：我哋全部都係女仔，乜都可以傾，由護膚品到愛情生活，好多私人嘢都會拎出嚟講，大家仲不斷諗有咩男仔適合大家。
同行易明白
陳：咁你覺得咩男仔啱我？
莊：我覺得你唔需要一個好照顧你嘅人，你似係鍾意型男，因為你老竇都好型。
陳：哈哈哈，我老竇係好型o架！不過我自己唔要有型靚仔，靚仔好易畀人搶走，或者小朋友係有呢啲諗法，外形好當然正啦，但首要大家溝通到先，咁你呢？
莊：溝通一定係最重要，外形其實順眼就得，當你覺得嗰個人好好傾嘅時候，就唔會介意外形。
陳：我又唔介意，因我同同年紀嘅人唔似，同佢哋溝通唔到，反而大啲都接受到，就算十年都OK。
莊：咁會唔會搵番同行？
陳：唔知呀，不過最好係同幕前有關嘅行業，化妝師、髮型師都可以，起碼大家都係呢行，會明白對方做緊乜，唔會挑挑剔剔。咁你同吳浩康最後分手收場，會唔會影響你再同圈中人拍拖？
莊：唔會，我唔抗拒同行o架，只要嗰個人明白我哋個行業做緊咩，因為平時同朋友傾偈，佢哋都覺得我哋啲返工時間好難想像。
難忍受 多限制
陳：我平時拍好多打戲，朋友話如果搵我做女朋友，一定都唔畀我繼續拍打戲，覺得我會成日受傷，其實我入得呢行就要做到最好，想趁後生專注事業。
莊：冇錯，除非佢可以立即娶我！
陳：我都係咁話，嫁咗畀你唔使做就可以放棄呢一行！但如果拍拖嗰陣要限住唔畀性感，又唔畀呢樣嗰樣，我就接受唔到。你試過同圈外人拍拖，會唔會好大壓力？
莊：一開始未公開就壓力大，記者朋友會不斷追訪，除咗同圈外人交代外，可能男友個身份亦代表緊佢公司，又要同公司交代，所以要經過好多人批准，考慮好晒先可以公布拍拖，仲要諗幾時、咩時候先好公開，嗰個時期就好大壓力。我唔知佢公司幾時覆，我日日要出去面對傳媒，自己知道講緊大話，又知道個大話就嚟會穿，個心理掙扎就好大，不過當公開咗就好好多，冇乜壓力。
忌女尊男卑
陳：咁同行拍拖呢？
莊：同行拍拖都有唔同嘢煩，大家嘅成長唔一定同步，女仔事業可能行快啲，咁會令一段關係更容易破裂，同幕前拍拖個心理質素會仲大。另外，雙方一定要有共識，好似我之前做隆胸手術咁，我哋有共識嘅，但當一啲報道出咗後，佢會因為外人壓力而講出唔係心入面嘅說話，我認為佢對外講嘅嘢都應該先畀我知道，若果大家冇共識就好尷尬。咁你幾耐冇拍拖？
陳：入行之後都冇拍過拖，覺得緣分要來便來。
莊：拍拖會唔會公開先？
陳：等穩定咗先，但如果一早畀人揭發都會認嘅，但可以的話都想收埋一陣先。唔似你，你一拍拖實公開啦！
莊：咁又唔係喎，我依家拍嘅話唔會講，因為有太多嘢要交代，就算分手都要先同對方商量點宣布，個感覺勁難受，所以決定咗除非畀人影到我拖手，唔係嘅話我都唔會認拍拖。
陳：係囉，我唔想連少少私人空間都冇埋。
可整容 咪貪心
記：有冇計劃過幾多歲前結婚或生BB？
莊：過咗Lu！以前想廿幾歲就生，不過其實生BB好視乎將來另一半，若只得我想生的話，生咗出嚟都係得一個人湊，咁對BB都唔健康。
陳：我父母好早分開咗，但冇因為咁對結婚有恐懼，若果遇到啱嘅人，我隨時閃婚都得。
莊：結婚會唔會公開先？
陳：我結咗一定話畀人聽。
莊：我怕自己講會變咗「自爆博出位」，唔講就變成講大話，有時都好難平衡。
陳：其實我好佩服你公開隆胸嘅勇氣，覺得你好犀利！
莊：你有冇諗過整形？
陳：我真係有諗過，我本身係雙眼皮，但唔係對稱，曾諗過去割，不過最後冇勇氣去整。
莊：其實整容唔係問題，最緊要唔好貪心，好多人整完會覺得呢度唔靚想再整。
陳：整得自然咪靚囉，唔使不斷咁整。
莊：你咁細個唔使整住。
陳：可能老咗出皺紋先打Botox。哈！每次同你傾偈我都有得着，今日又袋到滿滿咁走！
莊：實有下次嘅，到時再傾囉！
場地：Table 18 Bar & Restaurant@apm