Lisa S.捧女兒做top model
名模Lisa S.與型男吳彥祖（Daniel）拍拖八年，於2010年在南非結婚，下月初二人將迎接第一個愛情結晶品到臨，Lisa坦言既興奮又緊張，但自言是個開通媽媽，會給予女兒自由，讓她選擇自己的路，亦不抗拒女兒繼承衣缽做個top model！
L：Lisa S.
記：記者
記：你同Daniel第一次做父母，係咪好緊張？
L：係非常緊張！每一日都好緊張，特別距離分娩日子愈近，我就愈多嘢諗，相反Daniel表現到好開心，我諗佢都有少少緊張，只係冇表現出嚟，總之兩個都非常興奮。其實Daniel每一日都會親吻我，好甜蜜，有時都會錫我個肚，現階段可以話係一半興奮一半驚慌。
記：當BB第一次踢你，有乜感受？
L：覺得好真實，原來BB真係喺我肚裏面，雖然照超聲波見到BB，但只係得張相，當佢踢我時，終於感受到，哦！原來佢真係一個生命！
記：你準備好迎接BB未？
L：已經做好準備，等唔切想見佢，Daniel都係一樣，距離分娩三個月之前，我哋已經開始睇育嬰書，兩公婆一齊睇。
記：你覺得做媽媽最大嘅責任係乜？
L：要令小朋友生活喺安全嘅環境，確保佢食合適嘅食物，飲合適嘅奶，最重要係令佢開心，只要佢開心，我就滿足。
記：Daniel同BB兩個，邊個先係你最愛？愛到唔可以分開？
L：哈哈，呢個係好問題，依家BB未出世，我會揀Daniel，但之後我就一半半啦。唔知Daniel點揀呢？今晚會問吓佢，希望佢愛我同愛個女都係一樣。
星級家庭會有壓力
記：你有冇幫囡囡計劃定之後嘅路？
L：冇呀，因為都唔知下一秒會發生咩事，每日都唔同，唯一嘅計劃就係佢將來想做乜，我都會支持，因為呢個係佢嘅生命，唔應該由我去計劃，我責任只係保護佢，令佢安全，帶佢行一條正確嘅路，畀佢自由。
記：做全職媽媽？
L：會，因為第一次做媽媽，我想花多啲時間喺佢身上，對我嚟講，工作已經畀到我好大滿足感，係時候畀自己去享受家庭樂，享受同個女嘅生活點滴，我好幸福可以咁做，因為好多女人生完之後都需要返回工作崗位。
記：你同Daniel都係名人，驚唔驚囡囡成長過程會承受好大壓力？好多相機對住佢？
L：希望唔係，但真係唔知，希望佢可以有一個正常嘅童年，不過依家唔使擔心住，好多年後先需要擔心啦，希望佢好好享受做一個小朋友。我都驚有好多相機對住佢，咁對佢嚟講可能係一種壓力，但我相信影一個月，大家就會覺得悶，會有下一個目標，唔會經常跟住我哋。
記：如果有一日個女同你講，想做top model，你會唔會支持佢？
L：當然會支持！但要佢完成學業先，至少完成high school，我仲可以教佢我做過嘅嘢，會建議佢去多啲旅行，感受下做model要周圍飛嘅感受，但佢爸爸諗法唔同，最想個女讀完大學先工作，仲要唔好識男朋友，哈哈。不過畀我揀，我當然想佢做專業人士，娛樂圈係非常困難嘅行業，我選擇做model係因為嚮往自由，想周圍去旅行，我唔使好出名，只想見識呢個世界，有免費機票周圍去，但依家做model已經唔只係model咁簡單，如果佢真係堅持想入娛樂圈，我都會支持嘅。
Model主持不同體驗
近年Lisa除了modeling工作，還當上電視節目主持，她坦言兩者性質不同：「做model要好強壯，因為要面對批評，但就有機會着靚衫，有啲衫好貴，未必負擔到，藉工作關係就有機會着到。而做電視主持就令我有機會見到好多猛人，有啲嘉賓甚至好難得先有機會見到。」問Lisa可有遇過難應對的嘉賓？她自言非常幸運，遇過的嘉賓都很友善，包括一些荷里活巨星都對她好好，Lisa笑說：「我見到Megan Fox（美瑾霍絲）嗰刻，覺得佢好靚，我係咁讚佢好靚，佢又讚番我好靚，大家讚嚟讚去，真係好搞笑，佢真係好好。」
計劃生多一個孩子
記：會唔會追多個小朋友？
L：我哋都有生多個嘅計劃，等囡囡一歲先，我唔介意係仔定女，我諗Daniel想生個仔，因為可以陪佢玩，陪佢一齊睇波，不過我諗佢都冇乜所謂，有就已經好開心。
記：好多人覺得懷孕之後身材會走樣着唔到靚衫，你點睇？
L：我唔覺得，我好開心懷孕之後肥咗添，因為我之前太瘦，生完之後我至少要keep住肥過生之前十磅，我會減少modeling工作，其實唔一定要好瘦先係靚，有肉地着衫都可以好靚。坦白講，靚嘅孕婦服裝係非常難搵，因為喺香港冇太多有趣嘅孕婦衫畀你揀，但無論時尚與否，都係睇番你有冇突出個人特質。
記：時下好多年輕model都鍾意賣弄性感，你點睇？
L：如果我有好身材，都會展現出嚟，哈哈。因為依家有好多唔同類型嘅模特兒，有high fashion model、雜誌model、電影廣告model、性感model等等，如果佢哋選擇做性感model，而又覺得舒服嘅，why not？呢個唔係一個大問題。但性感唔係我風格，我冇嘢睇嘛，我依家（懷孕）有豐滿上圍，先可以着得性感啲，哈哈。
向新手爸爸取經
Lisa早前與劉偉恆導演及美素佳兒媽咪奶粉合作拍攝微電影，由於劉導演也是新手爸爸，他踢爆二人在片場的趣事：「同Lisa掛住講湊B經，連其他工作人員都圍埋嚟講埋一份，搞到唔記得roll機，我同Lisa講我第一次做人爸爸，唔敢抱個女，唔敢幫佢沖涼，佢就話：『Daniel又係咁講，乜你哋啲男人都係咁？』」劉導演又覺得Lisa將來會是一個開明媽媽。提到未來大計？他現時正籌備一本關於新手爸爸的書籍，今年書展就會推出。
採訪：李惠儀
攝影：謝國華
Stylist：Christie Simpson
場地：Rachel's Kitchen
髮型：Jimmy Chan@Hair Culture