苟芸慧 梁烈唯 兄妹唔過電

梁烈唯(唯唯)、苟芸慧(苟姑娘)屬同一位經理人,二人視大家如兄妹般,之後拍電視劇《飛虎》而更為熟落,苟芸慧不時找唯唯做傾訴對象,面對這個感情豐富又易哭的女孩子,唯唯都「冇有怕」,還叫苟姑娘想哭就哭,縱使二人關係密切,但面對苟芸慧這個「緋聞」惹火尤物,他們都沒有傳過緋聞。

梁:梁烈唯

苟:苟芸慧

指導演戲 陪伴左右

拍劇經驗尚淺的的苟姑娘在《飛虎》一劇要挑戰頗多的內心戲,熱心的唯唯不時作出指導,更在她需要幫助時陪伴身邊,此舉卻令工作人員誤會他有意追求苟姑娘!

梁:我哋拍《飛虎》之前已經係同一經理人,但係點熟o架?

苟:真係開始熟係拍《飛虎》,大家喺劇中做一對。你亦係我老師,因為呢個係我第一個有較多內心戲嘅劇,你同導演指導我去拍攝。

梁:你拍《飛虎》個角色係移情別戀嘅十三點,有少少差池就會令人反感,而且我個角色出嚟好討好,所以你個角色就更乞人憎,搞到網民鬧你。我私底下都成日氹你開心,啲工作人員以為我追你,不過我話你知,如果我真係追你,啲人實輸畀我,因為我喺你最需要人幫時陪伴你身邊。

苟:你嘅個性同我幾似,你諗嘢嘅出發點都好似我,但你係成熟啲,好似我哥哥咁。

梁:我會代入你嘅角度諗,我入行比你耐,明白你感受,人係需要經歷,有時都要等你去碰吓撞吓!你好勤力,但啲人只睇到你外表,所以好多時我都想提你,有乜可以避重就輕,咁就唔會畀人覺得你只係一個花瓶,你已經有個「女神」代號,但要繼續努力,咁好快就會成功。你優點係善解人意,從來都唔會令人覺得你恃靚行兇。

苟:我會保持距離嘅,人與人之間相處要好坦白,你女朋友一定好了解你。

梁:我覺得男藝人唔好怕喺女友面前講女藝人,就算平時都可以一齊約埋出嚟,如果真係有嘢咪會避囉!

坦誠相對 毋須避忌

談到對方的優點和缺點,唯唯認為苟姑娘杞人憂天,但亦有堅強的一面,而苟姑娘則大讚愛笑的唯唯成熟又善良,二人更因為坦誠相對,絕不擔心會傳出緋聞。

梁:不過我覺得你嘅缺點係諗得太多無謂嘢,反而正面啲去諗會開心啲。但喺拍《仁心解碼II》時你好堅強,當時你比較新,個導演對你信心唔夠,所以比較惡,拍嗰陣見你想喊咁!但你不斷去試,做到佢要求為止,呢個心態比好多人強。

苟:其實喺壓力下我唔識表達自己,可能人哋對我冇信心,所以要就一就自己情緒,呢個需要時間囉!

梁:同埋你爆完對件事冇幫助,反而仲衰,你要畀佢知,我雖然靚,但都做到。咁你覺得我有乜優點?

苟:你雖然經常笑哈哈,但其實好有深度,以你嘅年齡嚟講你已經好成熟,同埋你好善良,唔會點人。

梁:點解我哋未傳過緋聞?因為冇人影過?

苟:可能我哋都好坦白,從來冇避忌過,我哋知道大家幾時講笑、幾時認真,所以唔會有錯覺,同埋我覺得你好專一。

梁:我為佢(女朋友)做咗好多,做到嘅我都會做。相反我嘅缺點係畀人覺得我太開心,但當我靜落嚟,就會畀人覺得好惡,我都好情緒化,我覺得做娛樂圈失去咗一份真,就算假都要笑。

苟:呢個我都想講,嚟香港之前我唔知,但每一日我都掙扎究竟係要做真嘅我定係點,我已經好大壓力,但仲要顧及人感受會好辛苦,呢個要自己平衡。

對抗緋聞 一笑置之

苟姑娘對緋聞甚為「惹火」,自言說話技巧一般的她面對傳媒追問時難免緊張,而唯唯在娛樂圈打滾多年,認為做人要圓滑,總之面對緋聞最緊要一笑置之。

梁:我見到你啲緋聞好戥你唔抵!點解要咁樣屈人,啲觀眾真係咁想睇咩?我唔覺囉!作都唔緊要,但唔好有攻擊性囉!你都唔好咁緊張,譚校長成日訓示我,佢話你啱啱起步,做人要圓滑,娛樂新聞就係娛樂新聞,好似上次話我毆打兼強姦人,佢都驚我唔開心,叫我笑吓就算。

苟:我哋嘅行為其實好影響社會,我都明白傳媒嘅工作,但有啲嘢真係接受唔到,好多時有新聞出現我會檢討自己先,有時我唔係有心,但係講嘢技巧唔夠,每次答記者問題都好驚。

梁:有啲傳媒係畀個氹你踩,答乜都死,又去番校長講嗰句,娛樂新聞就係娛樂新聞,一笑置之就算!

後記:唔怕女仔喊

苟芸慧是一個很眼淺的人,有一次遭雜誌寫她「車震」,令到她於一個記者會上哭成淚人,唯唯當時在場,他坦言監製、高層樂易玲都叫他埋去看看她,殊不知卻換來被記者寫他博宣傳,認真無辜。二人訪問時,苟姑娘說到委屈時,都忍不住眼濕濕,但唯唯不但不怕苟姑娘哭,更謂:「千祈唔好忍住,想喊就喊,想嬲就嬲,唔好收埋。」這就是他倆相處的方式。

文:影視組

攝:沈健程

場地:美麗華商場