鍾麗緹寧缺莫濫 唔man唔揀

鍾意男士送花

在加拿大長大的Christy，性格鬼妹仔，又不介意展示其美好身段，一直是男士心目中的女神。在愛情路上，Christy跌跌碰碰，於1998年下嫁外籍丈夫Glen Ross，但2002年離婚，其後2008年再與台灣音樂人嚴錚結婚，2011年離婚。儘管如此，但她仍然像少女一樣對愛情敢愛敢恨。

我對愛情仍然好有信心，唔會放棄，由以前到依家個個都知我係愛情第一！做女人最緊要係愛自己，令自己開心，努力做嘢，再慢慢去搵forever love。依家冇諗咁多，等緣分啦，想順其自然！但係我從來唔會做主動，我覺得應該係男人追女人，我好鍾意男人送花、幫我開門，咁好有風度。呢方面我比較傳統，鍾意人嘅時候我會好怕醜，所以一定要個男人好有自信、好man，如果佢連同我講嘢都驚，咁佢唔好諗啦！要個男人畀到我安全感。不過我唔急，我有工作、有小朋友、有朋友，我覺得我已經好幸福！

Christy兩位前任老公Glen與嚴錚雖然國籍不同，但都高大有型。	Christy一有時間便會陪女兒玩耍。	Christy性格開朗，縱然感情路上有波折，仍充滿自信。

女兒令我後生

是三女之母的Christy，現獨力照顧三位千金。本身她不斷強調有保母幫手，所以不感吃力，不過慢慢地她開始表明心迹，坦言有時身兼父職都不禁感到辛苦。

Christy當年的纖體廣告，盡展美好身段，亦迷倒不少男士。	Christy早前演出《瘟》片，與內地新女神柳岩合作。	擁有越南血統的Christy，有意開越南食肆。

大女15歲，兩個細女4歲半同3歲。我成日同小朋友做運動，佢哋好鍾意游水，好活潑！同佢哋一齊玩一定要好活潑，我有時會扮老虎、獅子同佢哋玩，有小朋友令我感覺好後生！因為成日喺出面做嘢，返到屋企就想咩都想畀佢哋，所以有少少縱佢哋，少少啦！

我大女開始唔理我，佢有自己嘅世界，不過佢好乖，會主動去做義工，義教小朋友，所以我都唔擔心佢會學壞。

我希望盡量做個好媽咪同爹哋，有陣時我都覺得自己好辛苦，但係冇辦法，life就係咁樣！

想試其他片種

作為演員，都希望得到有發揮空間的角色，Christy都不例外，但礙於她性感的外表和家庭環境，形象難免被定型。早前她就嘗試驚慄片《瘟泉》，但她依然期待給觀眾驚喜。Christy更有意開餐廳做老闆娘，為事業闖一片新天地。

依家等緊好角色，好多人搵我，畀劇本我睇，但係我都搵唔到鍾意嘅角色，唔知點解成日搵我做單親媽媽，哈哈！好想畀觀眾surprise，好多角色未拍過，想演多啲有內心戲嘅角色。我有好多人生經驗，可以演愛情、搞笑、動作嘅戲，愛情、搞笑、動作都有就最好啦！

呢九年都喺北京，畢竟國內市場大。每個月我都會返嚟香港，見吓朋友，買吓奶粉，哈哈！啲朋友知我喺香港，就會安排好多活動，我想多啲返香港，好掛住香港！不過小朋友喺嗰邊讀書，都慣咗嗰邊嘅生活！依家嘅目標係喺北京開一間越南河粉餐廳，其實都諗咗好耐，依家仲搵緊地方，因為我有越南血統，我又好鍾意食河粉，想試吓做生意。

後記：

拍照當日，Christy擺甫士時所散發的自然美態和自信心，猶如重現多年前Christy非常火紅的纖體廣告一樣，力證女神性感魅力不遜當年。活潑開朗的Christy更毫無架子，現場教筆者一分鐘減肥法，她展示出女神之名，並非只有外在美，內在美同樣是一大標準。她的自信和她對愛情、生活的態度，的確值得現今女士學習。

文：瑜Fi

攝：沈健程

場地：J plus Boutique Hotel