女友拒北上探班 祖藍：我哋冇乜感情
王祖藍、黃智賢、萬綺雯、張繼聰昨日為新劇《食為奴》開鏡拜神，該劇五月將到橫店拍攝外景，問王祖藍可擔心內地H7N9疫情？他說：「冇辦法，依家個廠都好多人感冒啦，不過橫店都近杭州，盡量小心啦。」對於熱戀中的林峯不准吳千語到內地探班，祖藍笑言：「女友根本冇諗住嚟探班，我哋過咗嗰個階段，冇佢哋咁癡纏，我哋過晒喇，冇乜感情。」
內地近期跳水節目成為熱話，祖藍自言曾獲邀請，酬勞亦可觀，但惜因拍劇未能參與，問他豈不是見財化水﹖他說：「我愛TVB。」祖藍擦鞋後也自覺難頂，不停傻笑。
萬綺雯被拍得與老公講電話時一副冧樣，她笑說：「依家個個都笑我講電話時彈吓彈吓，不過我諗老公都一樣咁冧嘅。」她又指原打算拍畢《食》後便與老公到拉斯維加斯慶祝結婚13周年，但因波士頓遭恐怖襲擊而改往較安全的地方。