城城無痛失戀 北京尋歡歎火鍋

隨着熊黛林在微博自貼「分」戒，加上苟芸慧捲入三角關係，直至前日，七年「富黛戀」在得到Lynn親證後終宣告Game Over。富黛分手後，昨日兩人巧合地首度「同場」，前後腳現身香港機場離境大堂。猶記起去年11月，兩人從馬爾代夫回港甜蜜到痹，相隔不足半年，卻已勞燕分飛。

據悉飽受情傷的Lynn一心到韓國首爾散心幾天，昨午12時50分，身穿短Tee皮褸的她獨自急步直衝離境閘口，可見她左手尾指仍戴着「重新上路戒指」，雖然戴上黑超，亦難掩憔悴。Lynn更是叫極唔應，擰歪面避鏡頭，最後在排隊入閘前只向記者回應一聲「Bye Bye」。

重申不涉苟姑娘

同日4時24分，城城與經理人小美及助手抵達機場出發到北京工作，滿面鬚根的城城心情大靚，主動撩記者說：「又想問嘢呀？」記者重提Lynn前日似話有玄機的說：「我唔想傷害任何人，唔好再計較乜嘢原因。」此言一出，似乎觸動了城城神經，一向低調處理感情事的他，昨日破例首談「富黛」分手，再度發表「護苟宣言」：「其實我喺微博都講咗，不過我想講今次呢件事（分手）冇牽涉任何人，冇第三者。我講埋今次唔再講，對任何人要公平，今次係兩個人之間嘅事，唔牽涉第三者，對苟姑娘、對任何人都係無辜。」

落寞愁爆 熊黛林全程沒回應提問，只顧匆匆趕入閘。

前日熊黛林作出回應後，有指苟芸慧崩潰抑鬱，閉關不見人。

冷笑回應舊愛哭

城城更將Lynn由「城嫂」降呢為朋友，問到兩人仍是好朋友嗎？他說：「當然係朋友！」似乎連「好」字也談不上。而城城日前出口呵護喊爆的苟姑娘，可是對同樣落淚的Lynn似無動於衷，只發出一聲冷笑，低沉地「哈」一聲，明顯「護苟棄林」。

有美同行 心情靚靚的城城，與小美一同啟程上京。

孤身上路 熊黛林獨遊療傷，在機場表現得心事重重。

回復單身的城城原來滿腹「北上Happy大計」，與「投韓」的Lynn對比強烈。問到上京會否做足防疫措施？風騷的他如「開籠雀」一樣：「唔需要啦，我都唔係去人煙稠密嘅地方，我打算落機返酒店就跑步。都唔會食雞鴨鵝，其實最好係食火鍋，將啲細菌殺死。呀！今晚就食火鍋！」而城城掛着說險誤了登機時間，幸獲工作人員安排走職員通道，無阻北上歎火鍋大計。

文：音樂組