天佑首執導筒險抑鬱
組合Shine成員徐天佑出道多年，唱歌、演戲樣樣掂，今年更挑戰自己，首次執導微電影《子彈人》。為求效果盡善盡美，天佑身兼監、導、編、演四職，連後期製作都親自操刀，令他大呻辛苦：「就嚟做到抑鬱症！」但幸好朋友都對《子》片給予正評。
徐天佑今年初首次執起導演筒，拍攝微電影《子彈人》，除了當導演，他更是監製、編劇、演員，身兼四職。為求盡善盡美，甚至後期製作天佑都親自操刀，絕不假手於人，他說：「之前拍MV試過唔係自己剪片，達唔到個效果，所以幾辛苦都要自己剪埋！」
《子》片集科幻和懸疑於一身，雖片長只有13分鐘，但天佑都用了個多月時間做後期製作，令他大嗌辛苦，他謂：「就做到抑鬱症！最大難度係對自己嘅要求，每日剪片八個鐘，字幕都自己做，我做到Studio個老闆都叫我返屋企！」
喜獲正評
《子》片是天佑從自己所寫的短篇小說改編而成，問到為何首次執導便選擇這難度甚高的題材，他表示：「之前都諗過不如拍愛情故事，但係喺我寫小說嘅時候，個腦已經好多個畫面，始終文字係有限，所以一知道有機會拍微電影，我已經改編呢個劇本。」
天佑已率先給隊友黃又南和行內朋友觀賞《子》片，反應都正面居多，而中國移動香港的U channel亦會在五月首播。天佑更透露會報名參選康城影展等各大影展，希望讓更多人欣賞到自己的作品。
文：影視組
場地：TOP FLOOR BAR&GRILL
髮型：Louis Tse@P.O.P eight
化妝：Henry Tse