車婉婉孖霆鋒建飲食王國

車婉婉擁有多重身份，既是歌手也是演員、又是精通星相的「神婆」、更是米芝蓮食肆的星級老闆。早前有傳有意進軍飲食界的謝霆鋒都要向她取經，雖然兩人一直未肯公開合作大計，但婉婉默認兩人正密謀新搞作︰「我係一個唔鍾意先講再做嘅人，鍾意計劃晒，做好晒，跟住你哋就會見到o架喇！我哋平時食飯都會交流吓生意心得。我哋兩個做到好朋友係因為大家信念差唔多，基本上係同一種人。我山羊座同佢處女座，兩個星座係friend到爆，而且大家性格都係穩陣派。」

殺入保健界

婉婉最近又由飲食界殺入保健界，開設全港首間岩盤浴專門店，一向親力親為的她為新店忙得不可開交，問其圈外男友可有詐型？她笑說︰「佢都有話過我係工作狂，但最慘嘅係我唔覺得自己工作緊！」工作勁忙，婚期豈不是遙遙無期？原來她早已準備好做新娘子，更笑言︰「你點知我依家唔係搞緊？係會想結婚，但係我唔會搞到好大，我覺得只要兩個人係有承諾，想一齊到老嘅時候咪結囉！結咗你哋一定知啦！」

車婉婉與謝霆鋒都屬穩陣派，故兩人勁friend，不時被影到一起飯局。（資料圖片）

車婉婉殺入保健界，開設全港首間岩盤浴專門店。

唔放棄娛圈

不過她就突然大爆自己做了未婚媽媽︰「我個BB啱啱出咗世！即係我新錄好嘅星座真人騷，我想做呢個Project好耐，請咗陳奕迅、周柏豪等等做嘉賓，下個月出街！」說到底，婉婉最愛是依然是其演藝事業，她更透露簽了新經理人公司，希望今年主力在電影方面發展。

文：音樂組

髮型：Billy@Hair Culture

化妝：BLESSED ARE THE MEEK@Hysan I.T

場地：清心岩盤浴專門店