周啟生 周小君自食樂果唱好經典
周小君與周啟生兩姊弟的父親是著名喜劇演員周吉，但他們沒有遺傳爸爸的搞笑天分，亦沒有拍過電影，反而極具音樂造詣。兩人多年來先後與多位巨星如張國榮、林子祥、四大天王等合作，但偏偏就未試過姊弟檔合作，下月兩人終有機會在演唱會合唱以往的經典金曲。
周啟生與周小君從小學鋼琴，周啟生12歲開始作曲，作品《微妙的三角》於80年代更成為電台廣播劇主題曲，由家姐小君主唱，兩人多年來都為音樂付出不少心血。周啟生自爆曾為音樂付出「亡命72小時」：「試過3日3夜寫譜，返到屋企發現冇帶鎖匙，最後瞓喺屋企門口，阿媽返到嚟以為我暈咗。」而做過音樂節目主持的小君，曾為四大天王演唱會當和音及幕後代唱等多方面工作，現時依然視音樂為生命，她笑言家中全天候播音樂。
探討人生
兩人下月於九展開騷，周啟生視為集體回憶：「今次演唱會有9成嘅歌都係自己有份參與製作，仲專登揀啲大家最鍾意、一播音樂就知係咩嘅歌，就好似喺餐牌攞最想食嘅嘢出嚟。」小君亦說：「我希望以我嘅方式去演繹細佬以前寫畀陳百強、張德蘭等嘅歌。」
兩姊弟在樂壇闖蕩多年，想法自然有所轉變。周啟生以往作品如《天長地久》等都予人絕望感，但經歷過婚姻不如意後，他坦言改變了創作方向。周啟生說：「我係個感情失敗者，後生時幻想力豐富，但依家同葉世榮首新歌《愛情的歌》除咗講愛情，都會探討人生。」小君則稱不喜歡重複的生活，喜歡新嘗試：「我試過好多嘢，就係未試過同呢個咁有才華同天分嘅親人同台合作，所以就決定試吓。」
文：音樂組
攝：秦健輝
場地：EXP@Festival Walk
Hair：Abel Chow
化妝：Josephine Yu, MAKE UP FOR EVER ACADEMY