梁琤鳥倦回巢 過戲癮
女星梁琤最近與無綫簽下經理人合約，令不少人感意外，卻原來她早已立定主意非TVB不嫁。不過，感情仍是空白的她，自嘲現在是盛女加宅女的雙重身份。
梁琤突然重投無綫，還簽下經理人合約，確實令人感到意外，她說：「自己睇電視都係睇TVB，令到觀眾對我嘅打女形象改觀亦都係TVB嘅劇《烈火雄心》同《金枝慾孽》，fans咁多年講緊嘅都仲係呢兩套劇，記得我喺《金》劇中演嘅福貴人，所以我冇諗過其他電視台，CTI亦都冇接觸過。」
炸傷留陰影
現時藝人目標都是北望神州「搵人仔」，在大陸拍劇算得上是先頭部隊的梁琤早在十五、六年前已經北上， 或許是鳥倦知還令梁琤覺得是時候回巢，她說：「自己唔係有錢，但依家總算有能力可以選擇，想放多啲時間喺香港，今次返TVB只係希望角色有得發揮、有挑戰性，自己希望每日進步，演員嚟講電視劇嘅連貫性好啲，拍攝過程嘅滿足感比電影大啲。」
梁琤在1995年拍攝《影子敵人》爆炸戲被燒傷右手，雖然右手疤痕已經逐漸減退，但留在心內的陰影仍揮之不去，亦因為該次受傷，現在梁琤屋企只可以用電磁爐，她說：「依家拍爆炸戲都好大壓力，心跳得好快，受傷之後屋企唔可以用煤氣爐，好怕撻火嗰一吓。」
打女冇人追
在事業上拚搏多年的梁琤，但感情卻是交白卷，她笑謂：「我直情係盛女加宅女，入咗行係少咗人追，可能打女太深入民心，啲男仔第一句就問我係咪好打得，可能咁樣令到啲男士唔敢追我啩，一切順其自然啦。」
場地：Cucina@Marco Ploo Hong Kong
化妝：LING NG@LB MAKE UP STUDIO
採訪：影視組
攝影：李柏儒