Hidy「砌」男友 DaDa謀報仇
周秀娜（Chrissie）師妹Hidy及DaDa Lo近日齊齊練武做「打女」，為打得入型入格，兩人不惜被打到滿身瘀痕，Hidy直言師弟愈打愈快唔留手，DaDa則笑謂獲師父批准「報仇」，一於同對方「鍊」過。
Hidy（余曉彤）與DaDa Lo（盧頌之）近日拍攝卓韻芝執導的新片《爆3俏嬌娃》，與一眾高手過招，二人於半年前開始練功，更日日打到周身瘀傷，Hidy在戲裏面演個出手就打死人的人，絕招以腳為主：「有好多凌空腳法，因為我彈跳力較弱，要主力訓練彈跳，喺拳腳方面會練得再狠啲、招式再辣啲！」
被罰倒立
自稱戲裏戲外均「唔係好打得」的DaDa進步最神速，只見手執木棍的她揮灑自如，「大字馬」亦可以做到170度。
兩女大呻最辛苦是紮馬，Hidy說：「紮馬要紮半個鐘，紮一分鐘已汗流浹背，又要出拳收拳，唔練好基本功，步伐就唔靚、唔夠穩。」她們一起身就要從頭再來，DaDa說：「試過畀師父罰倒立，最甘係罰做體能、側腹肌。」
一身係傷
問到有否被打傷？曾學泰拳的Hidy謂：「打拳要食晒度力，拍戲就要點到即止，要識得收力，有時未掌握到好易打親人。我好驚同Chrissie對招，次次都打親佢，有次打到佢個頭腫咗！有時大家愈打愈快會用真力打，就會打到周身傷。」DaDa則笑謂：「師父話畀我哋報仇，佢話報到仇就代表佢哋唔夠快，打到佢係佢抵死唔識擋。」
打上癮的她們直言會繼續拜師練功夫，Hidy揚言以楊紫瓊作目標，私下更「野蠻女友」上身「打男友」：「男友以前玩過free-fight，試過發夢打功夫，嚇到佢即刻醒咗！有時同佢玩對招，之後佢同我老細呻：『佢晚晚返嚟打我！』」
文：影視組
場地：東方體育會