羅嘉良妻誕7磅4 「岩石」女
羅嘉良榮升第二任爸爸，其第二任妻子蘇岩於昨日中午時分為他剖腹誕下女兒，重約7磅4安士，母女平安，興奮的嘉良負責拍攝過程兼肩負剪臍帶重任，更與老婆感動到喊，但就未有警覺最近H7N9的危險，冇洗手就心急抱囡囡兼兩度錫面珠。
50歲的羅嘉良與38歲的內地演員蘇岩婚後兩年終有所出，昨早七時許蘇岩於微博中稱先敷面膜才入院產女，兩公婆約十時左右手拖手到港安醫院待產，於中午時分，「單非婦」蘇岩剖腹產女，重約7磅4安士，英文名為Sela（是以色列文意指岩石），中文名則暫未決定。蘇岩今次選擇開刀生產，只作半身麻醉，以清醒狀態下產女，嘉良稱過程很順利，但他事前亦有點緊張，不停吸煙，問老婆產女後可會考慮戒煙？嘉良說：「要戒就自然會戒！」
心急錫面珠
訪問後嘉良未有警覺最近H7N9的危險，便心急抱囡囡給傳媒拍照，忙於照鏡整頭髮而未有洗手，不過其囡囡幼嫩皮膚顯得很紅潤，與一臉鬚根的爸爸相映成趣，嘉良更兩度錫囡囡面珠，父愛氾濫。昨見囡囡眼睛很大，嘉良稱眼和嘴都很似太太蘇岩，而鼻就似他：「醫生話囡囡一出嚟就睜大眼又好快喊，我負責剪臍帶，（手震？）冇，好熟手，因為上次個仔（羅裕城）都係我剪，（擇時辰開刀？）冇擇吉時，只係唔想講時間怕公開囡囡時辰八字啫！（感動？）好開心，我同老婆都有喊！（獎勵？）愛係最好！（追多個？），要一齊商量！」
返深圳坐月
蘇岩產後將到深圳月子中心「坐月」，問可擔心最近內地H7N9的感染？嘉良稱最近有到當地視察：「中心好大規模，我唔擔心！（陪老婆？）陪一陣，我都會返北京睇吓間屋。（返內地可帶兩罐奶粉夠食？）有朋友返北京就叫佢幫手帶，最緊要合法途徑！」
文：影視組