蕭正楠壞腦 傲芝重手送禮
「哨牙仔」蕭正楠前日36歲牛一，獲一眾好友大搞驚喜、狂送眼鏡給他，「女友」何傲芝則送電腦，非常大手筆。不過，他一再強調與對方純屬好友，暫未有結婚的念頭。
近期憑劇集《仁心解碼II》「哨牙仔」一角人氣急升的蕭正楠於本月23日生日，眾好友方中信、伍詠薇、王浩信及「女友」何傲芝等，在22晚齊集某日式料理店為「壽星仔」大搞驚喜派對，賀其36歲牛一。蕭正楠說：「佢哋叫我幫手攞嘢，點知去到全部人都喺晒度，好多人都送眼鏡畀我，可能覺得襯番我近期『哨牙仔』個look。」
問到「女友」何傲芝送甚麼？他一再否認戀情：「好朋友啫，佢同細妹何傲兒好重手，夾份送部電腦畀我，可能知我電腦壞。」
李思捷春卷現身
對於傳與李思捷分手的王宝宝（春卷）亦有現身，Edwin透露當晚二人表現如常，但直言首見他們孖住出席私下飯敍，春卷則指與男友思捷感情穩定。
昨午蕭正楠出席《仁》劇宣傳活動，再被問大個仔幾時結婚？「哨牙仔」說：「冇諗過，會以事業為重。（兩個有共識？）唔使有共識，對感情事一向都低調處理，況且大家係好友階段。」提到劇中他甚有艷福，跟陳茵媺（Aimee）和苟芸慧均有對手戲，他笑道：「好多宅男都好羨慕我，遲啲同陳茵媺仲有Kiss戲。（何傲芝冇呷醋？）唔會有人呷醋，應該戥我開心。」
文：影視組