林莉模術不凡 巴黎行騷
名模林莉自一月初到了巴黎工作至今，憑美麗外貌及高挑身材獲得不少品牌賞識，早前她首次登上巴黎時裝周的天橋為兩個品牌行騷，升呢成為國際名模，為港爭光。
林莉今年一月毅然放下香港的工作，獨自到了巴黎闖天下，最終做出成績，有機會在時裝界殿堂的巴黎時裝周行騷，一圓其夢想。林莉在巴黎至今逗留了兩個多月，期間不停試鏡，由於香港模特兒在當地罕見，加上林莉身形高挑及氣質獨特，而且她懂流利英語，所以備受品牌歡迎，工作接踵而來。
為卡地亞示範
林莉的首項工作便是為著名珠寶品牌卡地亞做示範，之後又為巴黎時裝周其中兩個品牌行騷，而今次林莉可衝出香港踏足國際舞台，自己也付出不少努力。
對於自己的成績，林莉表現謙虛，她稱今次到巴黎純為學習及吸取經驗，並說：「巴黎係我嘅夢想之都，可以喺度行騷，我學到好多嘢，亦都知道喺咁頂尖嘅時裝世界之中，人哋係點做嘢。而且可以識到嚟自世界各地嘅模特兒，佢哋都好有經驗，教識我好多嘢。」
獨居學識烹飪
除了在工作上有得着，林莉亦趁今次機會學懂照顧自己，她笑言：「因為喺香港我同屋企人住，會依賴爸爸媽媽，喺巴黎要一個人住，我學識煮嘢食，例如煮意粉同沙律之類。其實我去巴黎之前，屋企人同公司都好擔心我應付唔到，不過今次係一個好好嘅成長經驗。」林莉在工作空檔，不忘四處遊覽，實行寓工作於旅遊。林莉預計4月9日才返港，今日生日的她要在巴黎獨自慶生。
文：名人組