王賢誌默認同志香港搞婚禮

現年42歲、本身為「王氏港建」太子爺的Vinci，坐擁家族50億事業王國，自然是城中一級筍盤。他出道以來一直鮮有傳出緋聞，但不時被拍得與同性出入，性取向成疑，不過當事人卻沒有直接回應。

拍拖四年冇壓力

至昨日凌晨Vinci接受電台同志節目《自己人》訪問，言談間終暗示自己的同志身份。他說：「四年前我喺一個新年派對上透過友人介紹認識對方，佢係一個移民咗去美國洛杉磯嘅澳門人，佢嗰次返嚟主要係探媽咪，大家好快就住埋一齊。雖然冇驚天動地，不過我覺得係緣分囉。」

今年情人節，王賢誌對另一半於微博發表愛的宣言。

王賢誌離開無綫後，即被亞視邀任亞姐司儀，一圓他恨做選美比賽司儀之夢。

由於對方性格洋化，所以沒有因Vinci的藝人身份而阻礙交心，相處亦無壓力，他直言開齋拍拖後感覺激烈，猶如「全世界只得對方」。剛過去的農曆新年初二，更是二人交往四周年紀念日，Vinci於情人節當晚在微博內有感而發留言：「特別挑選了大坑一餐廳跟C吃飯慶祝……四年時間不算太長，更漫長的路在前，要學要做的事還有很多……」可見他對這段感情相當重視及認真。

出身富裕的王賢誌出道初時，被指經常駕名車返電視城。	王賢誌棄影從商，獲父母大力支持。	鄭嘉穎與王賢誌是老表關係。

前晚Vinci與電台主持梁兆輝侃侃而談，直指由蒲普通酒吧到後來光顧基吧，覺得飲酒減壓亦是樂事，並坦承戀愛令他整個人蛻變了：「以前我好容易黑面發脾氣，依家喺屋企好似阿四咁做。佢唔鍾意執屋，所以由我負責，但要執兩個人嘅嘢，所以由朝執到晚。佢比較鍾意煮嘢食同種嘢，喺屋企種番茄大家食，搞到成間屋綠色，總之互補長短囉。我哋之間冇大吵，覺得彼此相處要開心見誠去講。我依家容忍度大咗好多，覺得自己變咗。」

擔心被指博宣傳

對於婚姻，Vinci自有一番憧憬：「愛一個人點解唔可以結婚呢？我仲想搞個大型嘅（婚禮），如果係咁一定要喺香港搞，多啲親朋戚友嚟到。不過呢樣嘢timing好緊要，依家未係時候。」

事後記者聯絡Vinci，他卻堅決不肯直接回應自己的性取向：「我唔會用『出櫃』同『come out』呢啲字眼，呢樣嘢黃耀明同何韻詩都做咗，亦唔想被人話跟風同博宣傳，總之大家意會啦。（38歲先初戀？）我唔會講大話嘅。（幾時確實自己嘅性取向？）我冇承認過啲咩，太細節嘅嘢亦唔會講。」

文：影視組