祖兒9度稱后坐「龍」椅

容祖兒、古巨基、謝安琪、劉浩龍、林峯、薛凱琪、羅力威、鄭融、胡鴻鈞、組合Super Girls、泳兒等前晚出席廣州舉行的《第九屆勁歌王全球華人樂壇頒獎音樂盛典》，一如本報所料，英皇以24個獎成大贏家，囊括三個大獎的祖兒穿上露背連身裙壓軸出場，在大會巧妙安排下避開與男友浩龍同場，雖然緣慳一面，但兩人夾定口供，異口同聲話「海報見到」知對方在場。

同場緣慳一面

九度封「勁歌后」的祖兒坦言不會計算得獎紀錄，只會做好自己工作，由於她受訪的座椅剛巧浩龍也坐過，祖兒笑說：「唔係嘛！（知浩龍同場？）知，海報寫咗。」隨即拉開話題表示在後台獲林峯大讚「靚咗」。浩龍攞獎受訪後即返香港，綵排時有否見到女友祖兒？他說：「冇。（你哋同車上嚟？）我公司大把錢，點會同唔同公司歌手同車？」難得同場卻緣慳一面？他說：「唔使啦，見你哋都得。（梗係啦你哋成日見？）唔話你知。」

劉浩龍	基仔身為英皇一哥，不負眾望成為勁歌王。

「Lorraine係我旗下」

六度封「勁歌王」的基仔被笑「威到盡」，他說：「唔係，都係咁做。」他奪獎時感激過往的女朋友，偏偏沒有答謝得力緋聞助手Lorraine，不怕她呷醋？基仔說：「咩呀？有多謝過佢一次。（因為日對夜對唔使講？）佢只識做兩樣嘢，最叻幫我做嘢同匿埋。」記者笑指Lorraine在他事業上幫助不少，基仔說：「我冇否定過。」

基仔昨日撐新人梁靖的場，二人曾合作拍攝ＭＶ。

前左起：林欣彤、祖兒、基仔、泳兒、鍾舒漫等為英皇取下24獎，成為大贏家。

基仔昨日亮相香港國際影視展台灣酒會活動撐女新人梁靖的場，他說：「今日上台因為兩個生命中嘅女人。」原來梁靖乃Lorraine新簽的藝人，梁靖曾為基仔拍過MV，不過基仔否認是他打本給Lorraine，有需要他會從旁提點，他跟英皇約滿後可會簽給Lorraine？他笑說：「我係英皇旗下，Lorraine係我旗下。」

文：音樂組