莊思敏簽新公司性感到底
王祖藍、許冠文、莊思敏、張暖雅及雨僑昨出席中國3D數碼娛樂有限公司記招，密實莊思敏的「峰」頭被穿低胸裙夾出三吋事業線的張暖雅搶盡，莊思敏說：「唔係吓吓鬥身材嘅，我加盟咗呢間公司，每年拍一至兩套戲。（要性感拍低俗題材戲？）冇底線，信導演同劇本，自己舒服就可以。」張暖雅揚言：「我黐晒膠紙防走光，撕番都驚痛，但好過走光。（雨僑見到你即時彈開？）我哋唔同風格，我行清純驚fans嘔。」
祖藍說：「許冠文係我偶像，合作《Delete愛人》會更認真同有火。（女主角係岑麗香？）爭取緊，希望佢唔好被『激情戲』嚇親，我同佢只有純情戲。（女友李亞男同你演激情戲？）我哋平時都好純情。」許冠文則說：「其實我唔鍾意演戲，只鍾意寫劇本同做導演，但我好欣賞王祖藍，佢真係前途無限。」
