Eason前衞配搭唔簡單
Knit-wear（針織衣物）重點是其款式和剪裁，很多時冷衫也會比較oversize，因此女士若配襯leggings或緊身牛仔褲是穩陣配搭，若配以絲襪就很容易會出事，因為上衣長度比較尷尬！而鞋履方面，穿波鞋具casual感覺，相反match高跟鞋效果會更優美，再配上clutch bag凸顯時尚風格。而陳奕迅（Eason）的西裝背心拼針織打扮，時裝作家Janice就覺得成個造型時尚又前衞。另外，她亦送上時裝貼士：「今季流行白色，放喺東方人身上，會令膚色顯得更光亮、精神。可惜易污糟難處理，我建議用膠袋封實衣物，咁就唔怕整污糟啦！」
何志恩
「件冷衫款式好靚，鬆身冷衫配窄身褲係classic搭配，而且有玩撞色，米色上衣撞白色鞋，桃紅下襬撞粉紅色褲，具青春少女感！」
何韻詩
「件冷衫款式好casual，佢一向唔會化濃妝，同佢嘅短髮及妝容好襯。上面嘅窩釘配飾，帶出咗佢tomboy嘅型格，呢個造型着出阿詩自己嘅性格出嚟。」
湯怡
「件針織上衣好特別，用唔同針織方式去製造，下襬同手袖嘅細節位好有睇頭。不過下身應該襯對leggings，佢好似着咗條厚絲襪，呢個長度比較尷尬，要注意番。」
陳奕迅
「有出其不意嘅感覺！成個造型唔簡單，Knit-wear拼西裝背心款，兩種質料拼湊，比較前衞，成個組合效果好好，背心有畫龍點睛感覺，斯文得來帶點前衞，非常之時尚。」
衞蘭
「過分casual，冷衫款式唔特別，而且又冇乜配搭。應該加番些少accessories點綴，始終出席公開場合要花多點心思，否則喺鏡頭下會變得好平凡。」
劉心悠
「髮型好復古、好女人，加埋襯咗件寬鬆冷衫，感覺似家庭主婦。如果換上時髦嘅妝容同髮型，成個效果就好唔同。不過心悠勝在夠sweet，平衡番。」
鍾欣桐
「化咗妝嘅鄰家女孩feel，上衣太casual，相比個妝容，就會產生太濃艷嘅感覺，而個髮型亦set得好行咁。如果轉番淡妝，頭髮放番落嚟會match好多。」
楊怡
「好普通嘅一件冷衫，好casual嘅款式，但佢個妝同髮型都唔match，襯呢件衫唔應該化濃妝，效果冇時尚感。」
Profile
王麗儀（Janice Wong），時裝作家及博客（blogger），是16年前華語媒體中首位遠赴歐美時裝周報道的時裝編輯。她經常為香港及海外的時裝設計比賽擔任評判，連美國CNN旗下亞洲生活時尚網站及香港Yahoo也分別讚譽她為「香港首位真正的時裝權威」及「時裝文化人」。