關心妍：我不嬲都唔後悔!
關心妍（Jade）早前在樂壇最後一個頒獎禮上慘食白果後，在微博宣布「唔攞獎」，即被網友嘲笑「未夠班」及「自我放棄」，Jade坦言能夠在樂壇屹立十一年並非易事，因她只是一棲藝人，雖然過去有不少好歌，偏偏失落「金曲獎」，令她感到付出與收穫不成正比。對每個頒獎禮都認真看待的她，奈何每次失望而回，她說：「我唔係意氣用事發爛渣，亦冇後悔咁講，我做人不嬲都唔後悔！」
吐出不快鬆晒
講完心情輕鬆咗，係諗咗好耐嘅決定，依家仲好，睇清楚方向，以後音樂可以多元化，始終喺呢行咁多年，想搵另一個模式去做，想有唔同思維，音樂係冇得退出，可能大家好驚我從此唔再唱歌，咁呢啲冇得講實同唔需要咁講，但唔會當事業去做。我同唱片公司係by project咁做，一直合作好好。公司都好明白我，叫我快啲生BB，之前開紅館演唱會時都講緊呢樣嘢，無奈一路延遲都未實行到。公司一早知道我最後一年玩，不過嗰刻心情有啲失望，就宣布埋，如果最後一個係TVB頒獎禮都會照樣講。
要交出成績
當然喺唱片公司角度梗係唔想歌手唔參加頒獎禮，自己都爭持咗好耐，後尾有聽公司意見參加埋，所以唔關有冇獎事，我唔想成日個焦點講成年，年頭派歌、年中、年尾要點……覺得好局限，唔想為做音樂而做音樂。從來未試過自由地去做我想做、唔敢做亦都唔可以做嘅嘢，完全唔係意氣用事，如果我出道一兩年、兩三年，有呢啲結果好正常，但我喺呢行好長時間，睇透咗一啲嘢，有時人在江湖、身不由己，歌手要繼續生存一定要交啲成績，成績就係銷量、獎項，話畀唱片公司知你生存空間喺邊度。
要懂遊戲規則
我冇後悔作出呢個決定，我做人不嬲都唔後悔！我覺得啱就去做，唔係點會走去做禁毒、幫弱勢社群，就係睇到啲嘢覺得要去改變、發聲，有一啲勇氣去做，亦都冇得後悔參加咗各大頒獎禮。年頭已經講唔去，最後公司想我去，每間公司都要派代表，呢個就係遊戲規則囉，一直尊重公司同各大電台，只係覺得好攰。
網友話我未夠班，真係冇所謂，無需要同人比，係我個人立場，我鍾意唔攞，你理得我啫？樂壇仲有好多唱得、有心人同新人，我做咗咁多年要轉吓形式，我係一棲歌手，就係支持樂壇，先話再做嘅音樂唔想有咁多掣肘同局限，想做一啲嘢但唔夠膽，因為太多商業因素，我哋冇辦法真正想做自己想嘅嘢，我唔係放棄咗樂壇。
要呵番老公
坦白講，點會對頒獎禮唔認真呢？我好認真做音樂、認真去「考試」，到最尾個結果原來唔使認真，咁我當初咁認真做咩？如果我係hea做、亂咁做、失場走音，咁得唔到結果好正常，可能學電台咁講太多歌手獎項有限啦，我都解釋唔到！
事後我冇喊，覺得唔值得亦唔需要，老公（楊長智）要我安慰番轉頭，佢心情仲無奈，陪我跑咗咁耐係冇結果。日後有音樂會頒獎禮頒獎畀我，我都唔會出席，我嘅經歷比較難，嘥咗好多時間去搞，唔再將啲時間放喺呢啲競逐同遊戲規則上，相信能夠做出更加精彩嘅嘢。
創先河覺好傻
我開演唱會都有好多歌，但《你有心》、《放生》、《負擔不起》都冇攞過金曲獎，係嗰刻我檢討自己係咪做得唔好？甚至慢慢走去做社會服務，冇再將焦點放喺樂壇。之後再返樂壇再做，又再一次失落，每年企得住喺度已經好艱難，如果我冇回報交到畀唱片公司，出年我已經消失！
我都唔知原來有好多歌手冇咁樣宣布過，感覺上好多歌手朋友冇參加頒獎禮，以為大家有宣布過，直到我睇完報道先發覺「死喇唔好意思」，嗰吓先覺得原來係前輩先講得。哎呀！我個人真係咁傻，唔會去考慮一切，但既然係我個心聲咪講囉，我想同樂迷交代聲，大家唔使再有期望，我唔係受唔到挫折，如果接受唔到晨早冇玩啦！
捱到係奇迹
2004年我開完演唱會後步入低潮期，其實嗰時可以唔堅持，網民唔明之後我再有機會出番碟，一年捱一年，捱捱吓就九年，我唔係放棄，由2004年可以捱到依家已經係奇迹，但原來我嘅努力未必成正比，我只覺得唔好咁玩啫！
口述：關心妍
筆錄：火品木
攝影：秦健輝
化妝：Cyrus Lee
髮型：Sev@Hair Culure