過氣情侶胡杏兒與黃宗澤（Bosco）昨日不約而同現身上海，各自為孭飛的新劇宣傳，雖然前後腳出現，避過同場的尷尬場面，但卻被發現穿上同色系列服裝，認為心有靈犀。事後二人大方表示即使再碰面亦不尷尬，Bosco更指已沒有與舊愛聯絡。
杏兒去年暑假宣布與相戀7年的Bosco分手，往後日子如同陌路人，即使兩人多次一齊出席大型活動，但亦可以成功避過同場的尷尬場面。前日杏兒與Bosco又到上海出席某集團舉行的新劇發布會，正當外間期待二人同台，最後只是前後腳亮相，但就被發現他們穿上同色系列服裝。
原來二人之所以有機會同台，全因接拍了同一投資方的劇集。以《少年神探狄仁傑》代表身份出現的Bosco率先亮相，被問愛情觀問題時，未知是否獲悉舊愛同場，Bosco選擇避重就輕未有回應，更表示與杏兒同台不尷尬：「今朝由橫店趕嚟，來去匆匆冇機會交流，後台我哋又唔係同一個化妝間，所以冇撞到。（前後腳喎！）大家唔同劇，點會同台呢？（私下後台見？）冇見到，做完即刻走返橫店啦！（可惜？）都係做嘢，冇所謂。（大家仲有冇聯絡？）呢排冇，各有各忙嘛！」
緊接Bosco劇組、以《紅酒俏佳人》主角現身的杏兒，與台灣男星邱澤一同亮相。抹上紅唇的杏兒自言已到了轉換戲路年齡，故打扮漸趨成熟。對於新劇角色經常受情傷，她坦言儼如現實生活的自己，即被內地傳媒聯想到上一段感情，杏兒對此謂：「佢哋要咁講都冇辦法！」提到與舊愛同場不同台，杏兒謂：「其實之前都知，不過最後冇見到面，就算見到都唔會尷尬嘅。（你哋着同色衫！）真係唔知呀！」
另外，邱澤近期被傳與內地演員唐嫣情變，他昨日終於承認分手，並謂：「感情是很私人，現在還是退回好朋友位置比較好！」
文：影視組