官恩娜租15萬豪宅：普通家庭啫
在娛樂圈拚搏十年的官恩娜（Ella）忽然富貴上身，悄悄由上水村屋搬到加多利山豪宅，多年來裝窮的她被《好報》踢爆是圈中「隱形」富家女，背後有個鑽礦爸爸大靠山，不過Ella打死唔認是富二代，不擔心懷疑被「包」，但承認官爸爸是珠寶商，租住十多萬豪宅的她說：「普通家庭啫！」
升呢成為「華納一姐」的Ella日前被《好報》獨家踢爆其富二代真身，入行十年的Ella一直扮窮，一個飯盒都分兩餐，最近卻突然富貴，鬼祟由上水村屋進駐月租十五萬元巨星雲集的何文田加多利山豪宅，原來「禾稈冚珍珠」的Ella背後有個鑽礦老竇做靠山，名副其實的富家女，但個性樸素的她堅持將真身隱瞞，都不想豪宅曝光，扮窮家女掩飾真身的Ella昨日多番否認說：「唔係，普通家庭。」
住加多利山貪方便
突然富貴的Ella租住十多萬加多利山豪宅，昨日她在電話中說：「唔係，我做嘢穩打穩紮，腳踏實地，搬到九龍係方便工作，月租唔使十萬，但幾多錢就唔講。」她否認有個鑽礦老竇，她笑說：「係小康之家，OK啦，爹哋係做珠寶，但珠寶分好多唔同級數，唔係鑽礦級。」官媽媽有大把鑽石珠寶留給Ella，她笑說：「我唔係特別鍾意戴鑽石，睇場合，唔會日日戴。」
有男友點會「被包」
死口不認是有錢女的Ella可擔心被懷疑被人「包起」？她笑說：「我有男朋友喎。」Ella重申所用的一分一毫都是自己努力賺回來，她說：「靠自己感覺最實在。」經濟獨立的Ella強調沒有靠家人，租金全由自己支付，每月更會給父母家用，她說：「由我出來做嘢，我都有畀家用，但求幾餐溫飽，有鍾意嘅工作，又唔係追求奢華。」
為免豪宅曝光洩露其富二代真身，連日來Ella都低調出入，棄自己私人座駕選搭的士，身為官家大小姐的她慳家成性，日前一身便服被影到在黃埔區超巿的$12元特價區踎低掃家品，又買包十穀粥醫肚就算，慳到你唔信。
文：音樂組