何嘉莉×陳柏熹 時裝癮君子
前英皇藝人何嘉莉（Lillian），出道時與天后容祖兒睇齊，後來為愛情放棄了璀璨的銀色事業，轉戰到幕後做形象設計；靜極思動的Lillian去年夥拍Moiselle太子爺陳柏熹（Harris）開設首間時裝店，終極目標是擁有自家牌子，成為有名有實的時裝潮人。十年人事幾番新，祖兒早已成為樂壇天后，榮升老闆娘的Lillian應該離夢想不遠！
近年香港時裝潮流漸趨國際化，時裝這門生意彷彿代表着身份象徵，尤其是名人明星。誰說人妻是C9（師奶）？看「E神嫂」徐濠縈時裝店一間接一間，成為了巴黎時裝騷坐上客，這是虛榮，也是成就！何嘉莉十多歲入行做藝人，在演藝事業高峰期毅然下嫁甜品店少東做人妻，命運其實老早安排好。婚後的Lillian轉型為舊公司旗下藝人當形象設計，半隻腳踩進時裝界。何嘉莉喜歡時裝，加上擁有得天獨厚的模特兒骨架，要接觸時裝這一行就事半功倍。時裝這條路，踏上了就不會回頭，而且還會上癮！去年懷孕期間忽發奇想，與同聲同氣的好友兼Moiselle太子爺陳柏熹（Harris）一拍即合，開設首間時裝店「Dour Studio」，二人一同實現了首個創業夢！
無心插柳 種下商機
至於Harris，夾着「Moiselle太子爺」之名踏進社交界，修讀時裝管理的他理所當然幫忙打理家族生意，對時裝早已有份使命感！2009年他發表了首個系列，獲得不錯的反應；Harris亦曾跟本地時裝設計師何志恩合作推出時裝服飾，其累積的經驗並不少！跟Lillian相識數載，二人經常結伴到外國「尋寶」，久而久之種下了商機種子，Lillian說：「舊年我哋傾偈話不如搵啲嘢搞吓，跟住就開始搵舖，就係咁開咗間舖，並唔係有好大嘅計劃！」有些事情如果現在不做，就一輩子都不會做，有時候無心插柳柳成蔭，在瘋狂租金的大氣候下，終於找了一間1,100呎的樓上舖，從此掛着「老闆」這個身份！
多一個人 多一個腦
從前留有一把長髮的Lillian，近年剪了一頭清爽短髮，型格十足，對於穿衣，Lillian同樣不忸怩：「我比較鍾意着短褲，有少少性感又唔係好刻意，不過我着衫都好睇心情，心情唔好時反而會着鮮色啲cheer up自己，心情好時就做番平時咁，即係沉色啲，我鍾意中性少少，太女人唔啱我！」時代不同，不是把整個名牌子穿上身就是潮流，現今fashion都走向隨意與簡約，Harris也說自己穿衣最愛「亂搭」，襯出驚喜！二人對時裝都有份己見，這份「異見」卻擦出了奇妙的火花，Harris說：「梗係有唔同意見嘅時候，呢個就係最值錢嘅地方，如果只要相同嘅聲音，咁使乜一齊搞，自己搞都得啦，多一個人多一個腦多一份睇法，多一雙腳一齊走到目標！」
有意設計 自家品牌
創業要有份野心和狂熱才能成功，尤其是年輕人，Harris說希望時裝店18個月回本，也有構思一開二、二開三，把這盤生意愈滾愈大；Lillian則希望可以推出自家牌子，首選是首飾：「我對設計都有興趣，自己本身都鍾意戴啲首飾配襯，而且設計首飾暫時比較容易handle！」現時店內的服飾全都是來自歐美國家，她說：「呢一兩年市道唔好，所以好想可以有啲平、靚同正嘅嘢畀大家，呢個都係我哋開舖嘅宗旨！」店內服飾不是太多，走簡約路線，Harris說：「我哋揀嘅衫都係簡單容易襯，大部分都係黑、白同灰色，因為我哋自己着衫都係咁，其實舖頭好多衫都係我哋自己鍾意嘅，好有我哋嘅影子！」在旁的Lillian則謂：「其實着衫係應該跟自己喜好而着，而唔係盲目跟隨潮流，每一季都總有啲must buy item，將新同舊嘅嘢mix & match，一樣可以着出型格！」
英皇三小花之一
曾被喻為英皇三小花的何嘉莉、容祖兒及葉佩雯，現時三人各走自己的路，當中以何嘉莉最早踏入人生另一階段，去年更誕下一子Jean，成為名副其實的潮媽，難得她表示打算為兒子添一名弟弟或妹妹，不讓兒子孤單；而葉佩雯也於去年嫁給作曲人郭偉亮；天后祖兒則於去年與劉浩龍譜出「龍兒戀」！
甚少贊助圈中人
陳柏熹與何嘉莉均與圈中名人明星稔熟，但兩人甚少贊助服飾給他們，因為希望做到是客人真心欣賞而主動入貨，而非成了商業交易，Harris說：「衫真係少啲贊助，首飾都會間中借畀人，好似何韻詩個演唱會都有戴我哋啲首飾，同埋都試過有形象指導會幫個星嚟買衫！」
後記
訪問當天，店內只有一個售貨員，Harris解釋說他們到外國shopping時，最怕遇到「黐身」售貨員，感同身受下，他們也對員工作出「自由」的培訓，Harris笑說：「我哋會同佢哋講，唔好mark實啲客，我哋希望嚟嘅客人都睇得開心，買得開心，唔係好似畀人監視咁！」
採訪：Ada Lam
攝影：吳文聰